കണ്ണൂർ കോർപറേഷനിൽ അഴിമതിക്കഥകളും തമ്മിലടിയും: മുഖംനഷ്ടപ്പെട്ട്‌ യുഡിഎഫ്‌
കണ്ണൂർ
അഞ്ചുവർഷത്തെ അഴിമതിക്കഥകളും സീറ്റിനായുള്ള കോൺഗ്രസിലെ അടിയും സീറ്റുചർച്ചയിൽ ലീഗുമായുള്ള തർക്കവുംകൂടിയായതോടെ പ്രതിസന്ധിയിൽ മുങ്ങുകയാണ്‌ കണ്ണൂർ കോർപ്പറേഷനിൽ യുഡിഎഫ്‌. നഗരത്തിൽ ഒരു ഭരണനേട്ടവും ഉയർത്തിക്കാണിക്കാനില്ലാത്തതും യുഡിഎഫിന്‌ തിരിച്ചടിയാകും. അഴിമതിയിൽ മുങ്ങിയ കോർപ്പറേഷനിലെ യുഡിഎഫ്‌ ഭരണത്തെ തൂത്തെറിയാനുള്ള തയ്യാറെടുപ്പിലാണ്‌ ജനങ്ങൾ. ആദ്യടേമിൽ കോൺഗ്രസ് നടത്തിയ വെട്ടിപ്പിനെ കടത്തിവെട്ടുന്നതാണ്‌ രണ്ടാംടേമിലെ ലീഗ്‌ മേയറുടെ തീവെട്ടിക്കൊള്ള. കോർപ്പറേഷനിൽ ഭരണത്തിലെത്തിയതുമുതൽ തർക്കവും തമ്മിലടിയും തുടങ്ങിയിരുന്നു. യുഡിഎഫിന്‌ ഭരണം കിട്ടിയതോടെ മൂന്നുപേരായിരുന്നു മേയർ സ്ഥാനത്തേക്ക്‌. ഡിസിസി പ്രസിഡന്റ്‌ മാർട്ടിൻ ജോർജും ടി ഒ മോഹനനും പി കെ രാഗേഷും. ജയിച്ചാൽ മേയർ സ്ഥാനം വാഗ്‌ദാനം ചെയ്‌താണ്‌ ഇടഞ്ഞുനിന്ന പി കെ രാഗേഷിനെ കഴിഞ്ഞ തെരഞ്ഞെടുപ്പിൽ കോൺഗ്രസ് ഒപ്പം കൂട്ടിയത്‌. മേയർ സ്ഥാനത്തിന്‌ മറ്റു രണ്ടുപേരും അവകാശവാദം ഉന്നയിച്ചതോടെ കലാപമായി. മാർട്ടിൻ ജോർജിനെ നേതൃത്വം ഇടപെട്ട് പിൻമാറ്റിച്ചതോടെ ടി ഒ മോഹനനും പി കെ രാഗേഷും തമ്മിലായി മത്സരം. ഒടുവിൽ രഹസ്യവോട്ടെടുപ്പ്‌ നടത്തിയാണ്‌ ടി ഒ മോഹനനെ മേയറാക്കിയത്‌. ഇ‍ൗ വോട്ടെടുപ്പ്‌ ചിലർ അട്ടിമറിച്ചതാണെന്നും പിന്നീട്‌ ആരോപണമുയർന്നു. മേയർസ്ഥാനം രണ്ടരവർഷം കോൺഗ്രസിനും പിന്നീട്‌ മുസ്ലിം ലീഗിനുമെന്നായിരുന്നു യുഡിഎഫിലെ ധാരണ. രണ്ടരവർഷം കഴിഞ്ഞും മേയർസ്ഥാനം കൈമാറാത്തതിനെത്തുടർന്ന്‌ യുഡിഎഫിൽ പൊട്ടിത്തെറിയുണ്ടായി. ലീഗ്‌ അന്ത്യശാസനം നൽകിയിട്ടും വിട്ടുനൽകാൻ കോൺഗ്രസ് തയ്യാറായില്ല. കോർപ്പറേഷന്റെ പരിപാടികൾ ബഹിഷ്‌കരിക്കുന്നതടക്കമുള്ള കടുത്ത നടപടികളിലേക്കും ലീഗ്‌ നീങ്ങി. പ്രതിപക്ഷ നേതാവ്‌ വി ഡി സതീശന്റെ പരിപാടി ബഹിഷ്‌കരിക്കുന്നതിലേക്കെത്തിയതോടെ നേതൃത്വം ഇടപെട്ടു. മേയർസ്ഥാനം കൈമാറുമെന്ന്‌ വി ഡി സതീശൻ ഉറപ്പുനൽകിയതോടെ ബഹിഷ്‌കരണം പിൻവലിച്ചെങ്കിലും ഉറപ്പുപാലിച്ചില്ല. മൂന്നുവർഷം കഴിഞ്ഞാണ്‌ പിന്നീട്‌ ലീഗിന്‌ മേയർ സ്ഥാനം ലഭിച്ചത്‌. കഴിഞ്ഞ അഞ്ചുവർഷവും അഴിമതിയും യുഡിഎഫ്‌ ഭരണസമിതി മുഖമുദ്രയാക്കി. ചേലോറയിലെ മാലിന്യസംസ്‌കരണത്തിന്‌ കരാറെടുത്ത കന്പനിയുമായി ചേർന്ന്‌ 1.77 കോടി രൂപ തട്ടിയതായി സിഎജിയാണ്‌ കണ്ടെത്തിയത്‌. പയ്യാന്പലത്തെ വാതക ശ്‌മശാനം നിർമാണത്തിലും സ്‌കൂളുകൾക്ക്‌ വാട്ടർ പ്യൂരിഫയർ നൽകിയതിലും പടന്നപ്പാലത്തെ മലിനജല സംസ്‌കരണ പ്ലാന്റ്‌ നിർമാണത്തിലും കെട്ടിടങ്ങളിൽനിന്ന്‌ വാടക ഇ‍ൗടാക്കുന്നതിലുമെല്ലാം ക്രമക്കേടുകൾ കണ്ടെത്തി. ക്രമക്കേടിനെത്തുടർന്ന്‌ മരക്കാർകണ്ടി പ്ലാന്റിന്റെ ടെൻഡർപോലും റദ്ദാക്കി. ലീഗ്‌ രണ്ട് സീറ്റ്‌ കൂടുതൽ ചോദിച്ചതോടെ ഇക്കുറിയും കോൺഗ്രസുമായി തർക്കം തുടങ്ങിയിട്ടുണ്ട്‌. കോൺഗ്രസിന്റെ നിഷേധ നിലപാടിനെത്തുടർന്ന്‌ ആദ്യ ചർച്ചയിൽ ലീഗിന്‌ ഇറങ്ങിപ്പോകേണ്ടി വന്നു. കഴിഞ്ഞതവണ സംഘർഷത്തിലേക്കുവരെയെത്തിയ സീറ്റ്‌ ചർച്ച ഇക്കുറി എന്താകുമെന്നതാണ്‌ ജനങ്ങൾ ഉറ്റുനോക്കുന്നത്‌.
Related News
Dont Miss it
0 comments