കോടികളുടെ കളിയാണ്‌ സാറേ

കണ്ണൂർ

തോട്ടട അഭയനികേതൻ ഭരണസമിതിയുടെ വൈസ്‌ പ്രസിഡന്റ്‌ സ്ഥാനത്തുനിന്ന്‌ കണ്ണൂർ മേയറും തലശേരി നഗരസഭാ ചെയർമാനും ഒ‍ൗട്ട്‌. ബൈലോ പ്രകാരം വൈസ്‌ പ്രസിഡന്റാകേണ്ട ഇരുവരെയും മെമ്പർമാത്രമാക്കിയത്‌ ആരാണെന്ന്‌ ആർക്കുമറിയില്ല. കഴിഞ്ഞ ഭരണസമിതിവരെ കണ്ണൂർ മേയർ വൈസ്‌ പ്രസിഡന്റായിരുന്നെങ്കിലും പുതിയ ഭരണസമിതി വന്നപ്പോൾ ആ സ്ഥാനത്ത്‌ ആരോഗ്യ സ്ഥിരംസമിതി ചെയർമാനായി. പ്രതിവർഷം കോടികൾ എത്തുന്ന സ്ഥാപനത്തിന്റെ ഭരണനേതൃത്വം കൈയാളുന്നതിൽനിന്ന്‌ മുസ്ലിംലീഗ്‌ നേതാവായ മേയറെ മാറ്റിനിർത്താനുള്ള കോൺഗ്രസിന്റെ കളിയാണ്‌ ഇതിലൂടെ പുറത്തുവരുന്നത്‌. ജൂലൈ 30നാണ്‌ തോട്ടട അഭയനികേതന്റെ ജനറൽബോഡി യോഗം നടത്തി ഭാരവാഹികളെ തെരഞ്ഞെടുത്തത്‌. സി വി വിജയനാണ്‌ സെക്രട്ടറി. കോൺഗ്രസ്‌ എളയാവൂർ മണ്ഡലം പ്രസിഡന്റ്‌ സതീശൻ അമ്പൂക്കനാണ്‌ ട്രഷറർ. കണ്ണൂർ കോർപറേഷൻ മേയർ മുസ്‌ലിഹ്‌ മഠത്തിലും തലശേരി നഗരസഭാ ചെയർമാൻ കെ എം ജമുനാറാണിയുമാണ്‌ ബൈലോ പ്രകാരം വൈസ്‌ പ്രസിഡന്റാകേണ്ടത്‌. എന്നാൽ വൈസ്‌ പ്രസിഡന്റാക്കിയത്‌ കണ്ണൂർ കോർപറേഷൻ സ്ഥിരംസമിതി ചെയർമാൻ എം പി രാജേഷിനെ. തലശേരി നഗരസഭാ ചെയർമാനെയും കണ്ണൂർ മേയറെയും ഭരണസമിതിയിൽ അംഗങ്ങളായിമാത്രം ഉൾപ്പെടുത്തി. 2022 ആഗസ്‌ത്‌ രണ്ടിന്‌ നിലവിൽ വന്ന ഭരണസമിതിയിൽ അന്ന്‌ മേയറായിരുന്ന ടി ഒ മോഹനനായിരുന്നു വൈസ്‌ പ്രസിഡന്റ്‌. നിയമപ്രകാരം കലക്ടറാണ്‌ സൊസൈറ്റി പ്രസിഡന്റ്‌. കലക്ടർ അരുൺ കെ വിജയൻ ജനറൽബോഡിയിൽ പങ്കെടുത്തിട്ടുമില്ല. കണ്ണൂർ, തലശേരി നഗരങ്ങളിലെ ആരോരുമില്ലാത്ത ഭിക്ഷാടകരെ പാർപ്പിക്കുന്നതിന്‌ 1963ലാണ്‌ തോട്ടട അഭയനികേതൻ ആരംഭിച്ചത്‌. 20 ഏക്കർ ഭൂമി സർക്കാർ ഏറ്റെടുത്തുനൽകി. കണ്ണൂർ, കാസർകോട്‌, വടക്കേ വയനാട്‌ ഉൾപ്പെടെയുള്ള പ്രദേശങ്ങളിൽ കണ്ണൂർ, തലശേരി എന്നിവിടങ്ങളിലാണ്‌ അന്ന്‌ നഗരസഭ ഉണ്ടായിരുന്നത്‌. ഇ‍ൗ രണ്ടു നഗരസഭകളിലെയും ഭിക്ഷാടകരെ പാർപ്പിക്കുന്നതിന്‌ സൊസൈറ്റിയായാണ്‌ സ്ഥാപനം രജിസ്‌റ്റർ ചെയ്‌തത്‌. രണ്ടു നഗരസഭകളിലെയും കെട്ടിടനികുതി വരുമാനത്തിന്റെ രണ്ടു ശതമാനം അഭയനികേതന്റെ പ്രവർത്തനങ്ങൾക്കായി നൽകണമെന്നായിരുന്നു സർക്കാർ നിർദേശം. വ്യക്തികളിൽനിന്ന്‌ വിശേഷദിവസങ്ങളിലടക്കം സ്‌പോൺസർഷിപ്പുകൾ സ്വീകരിക്കാനും വ്യവസ്ഥ ചെയ്‌തു. രണ്ടു നഗരസഭകളിൽനിന്നായി എട്ടുകോടിയോളം രൂപ അഭയനികേതന്‌ നികുതിയിനത്തിൽനിന്നുമാത്രം ലഭിക്കുന്നുണ്ടെന്നാണ്‌ കണക്കുകൾ വ്യക്തമാക്കുന്നത്‌. ഉച്ചഭക്ഷണമടക്കം ദിവസേനയുള്ള സ്‌പോൺസർഷിപ്പുകൾ ഇതിനുപുറമെയുണ്ട്‌. 37 അന്തേവാസികളാണ്‌ അഭയനികേതനിലുള്ളത്‌. നിയമപ്രകാരം നടക്കേണ്ട നടപടിക്രമങ്ങൾ മുഴുവൻ കാറ്റിൽപ്പറത്തിയാണ്‌ അഭയനികേതന്റെ പ്രവർത്തനങ്ങളെന്നാണ്‌ പരാതിയുയരുന്നത്‌. സാമൂഹ്യനീതിവകുപ്പിനെയോ സൊസൈറ്റിയുടെ പ്രസിഡന്റായ കലക്ടറെയോ പുതിയ ഭാരവാഹികളെ തെരഞ്ഞെടുത്ത വിവരംപോലും ഇതുവരെ അറിയിച്ചിട്ടില്ല.