തെളിയുന്നു, ജനമനസ്സ്‌

കൊടകര

‘‘ മുഖമൊന്നും ഓർമ നിൽക്കുന്നില്ല മോനേ...എന്നാലും ചിഹ്നം മറക്കില്ല...’’ സ്ഥാനാർഥിയുടെ കൈപിടിച്ച്‌ വിജയമാശംസിക്കുന്പോൾ കൊടകര കാവുന്തറയിലെ 75 പിന്നിട്ട ആനിക്ക്‌ സംശയമേതുമില്ല. പതിറ്റാണ്ടുകളായി ഹൃദയത്തിൽ പതിഞ്ഞ ചിഹ്‌നമാണ്‌. ജില്ലാ പഞ്ചായത്ത്‌ കൊടകര ഡിവിഷൻ സ്ഥാനാർഥി കെ ജെ ഡിക്‌സൻ വോട്ടർമാരെ കാണാനെത്തുന്നതറിഞ്ഞ്‌ അയൽക്കാർക്കൊപ്പം എത്തിയതാണ്‌ ആനി. സ്ഥാനാർഥിയെത്തിയപ്പോൾ സുഹൃത്തുക്കളായ ശാന്തയ്‌ക്കും പാറുക്കുട്ടിക്കുമൊപ്പം മാലയിട്ട്‌ സ്വീകരിച്ചു. ഒ‍ൗപചാരിക സ്വീകരണ പരിപാടി ആരംഭിച്ചിട്ടില്ലെങ്കിലും നാടിന്റെ മനസ്സുതൊട്ട്‌ പ്രചാരണം തുടരുകയാണ്‌ കെ ജെ ഡിക്‌സൻ. ഡിവിഷനിൽ പരിചയപ്പെടുത്തലിന്റെ ആവശ്യമേയില്ല. നേരത്തേ ജില്ലാപഞ്ചായത്തംഗമായി പ്രവർത്തിച്ച മുൻപരിചയം കൈമുതലാണ്‌. കഴിഞ്ഞതവണവരെയുണ്ടായിരുന്ന പുതുക്കാട്‌ ഡിവിഷൻ ചെറിയ മാറ്റങ്ങളോടെ നിലവിൽവന്നതാണ്‌ കൊടകര ഡിവിഷൻ. നേരത്തേ പുതുക്കാട്‌ ഡിവിഷനെ ജില്ലാ പഞ്ചായത്തിൽ പ്രതിനിധീകരിച്ചിട്ടുണ്ട്‌ കെ ജെ ഡിക്‌സൻ. ഡിവൈഎഫ്‌ഐയിലൂടെ പൊതുരംഗത്തെത്തി. നിലവിൽ സിപിഐ എം കൊടകര ഏരിയകമ്മിറ്റിയംഗവും കെഎസ്‌കെടിയു ജില്ലാ ജോയിന്റ്‌ സെക്രട്ടറിയുമാണ്‌. നാട്ടിൽ സുപരിചിതനായ ഡിക്‌സന്‌ തെരഞ്ഞെടുപ്പ്‌ പ്രചാരണം പരിചയം പുതുക്കലാണ്‌. വെള്ളിയാഴ്‌ച രാവിലെ കൊടകര പഞ്ചായത്തിലാണ്‌ വോട്ടഭ്യർഥിച്ചത്‌. കാവുന്തറ കനാൽ പരിസരത്തുനിന്നാണ്‌ സ്ഥാനാർഥികളെ കാണാൻതുടങ്ങിയത്‌. പിന്നീട്‌ നാല്‌ മരണവീടുകളിൽ സന്ദർശനം. ഉച്ചക്കുശേഷം മറ്റത്തൂർ പഞ്ചായത്തിലെ വിവിധ കേന്ദ്രങ്ങളിലും വരന്തരപ്പിള്ളി പഞ്ചായത്തിലെ മുപ്ലിയം പിടിക്കപ്പറന്പ്‌ മേഖലയിലും വോട്ടർമാരെ കണ്ടു. സിപിഐ എം ഏരിയ കമ്മിറ്റിയംഗങ്ങളായ പി ആർ പ്രസാദൻ, കെ സി ജെയിംസ്‌ എന്നിവരും ഒപ്പമുണ്ടായിരുന്നു.