കുരുക്കൊഴിയാതെ 
ഇടപ്പള്ളി– -മണ്ണുത്തി ദേശീയപാത

ചാലക്കുടി

ദേശീയപാത അതോറിറ്റിയുടെ കെടുകാര്യസ്ഥതയിൽ കുരുക്കൊഴിയാതെ ഇടപ്പള്ളി– -മണ്ണുത്തി ദേശീയ പാത. മുരിങ്ങൂര്‍, കൊരട്ടി, ചിറങ്ങറ മേഖലകളിലാണ്‌ പ്രതിസന്ധി രൂക്ഷം. ആംബുലന്‍സുകളും വിമാനത്താവളത്തിലേക്കുള്ള വാഹനങ്ങളും അടിപ്പാത നിര്‍മാണം നടക്കുന്ന ഈ മേഖലയിലെ കുരുക്കില്‍ കുടുങ്ങുന്നത്‌ സ്ഥിരം കാഴ്‌ചയാണ്‌. ദീര്‍ഘദൂര യാത്രക്കാർ മണിക്കൂറുകളോളം വഴിയില്‍ കിടന്ന് ദുരിതമനുഭവിക്കുകയാണ്. ഒരു മുൻകരുതലുമില്ലാതെ ദേശീയപാത അതോറിറ്റി അശാസ്‌ത്രീയമായി നിർമാണം ആരംഭിച്ചതാണ്‌ പ്രശ്‌നങ്ങൾക്ക്‌ വഴിവച്ചത്‌. അപാകതകളെത്തുടര്‍ന്ന് നിര്‍മിക്കലും പൊളിക്കലുമാണ് ഇവിടെ നടക്കുന്നത്. കലക്ടറടക്കമുള്ളവരുടെ ഇടപെടലിനെത്തുടര്‍ന്ന് നടത്തിയ സര്‍വീസ് റോഡിലെ ടാറിടൽ വഴിപാടായി മാറിയത്‌ സ്ഥിതി കൂടുതൽ വഷളാക്കി. സർവീസ്‌ റോഡ്‌ ശരിയാക്കാതെയാണ്‌ നിർമാണ പ്രവർത്തനം ആരംഭിച്ചത്‌. ഇതേത്തുടർന്ന്‌ ഹൈക്കോടതി പാലിയേക്കരയിൽ ടോൾ പിരിവ്‌ നിർത്തിവയ്‌പ്പിച്ചു. തുടർന്ന്‌ നടത്തിയ ടാറിങ്‌ കണ്ണിൽ പൊടിയിടാൻ ലക്ഷ്യമിട്ടായിരുന്നു. ടാർ ചെയ്‌ത സര്‍വീസ് റോഡില്‍ ദിവസങ്ങള്‍ക്കുള്ളില്‍ കുഴികള്‍ രൂപപ്പെട്ടത് വീണ്ടും ഗതാഗത തടസ്സം സൃഷ്ടിച്ചു. ശരിയായ സർവീസ്‌ റോഡില്ലാത്തതിനാൽ അടിപ്പാത നിര്‍മാണം നടക്കുന്ന സ്ഥലത്ത്‌ പലപ്പോഴും കിലോമീറ്ററുകളോളമാണ്‌ വാഹനങ്ങളുടെ നിര. മുരിങ്ങൂര്‍ അടിപ്പാത നിര്‍മാണ ഭാഗത്താണ് കൂടുതല്‍ കുരുക്ക്. സര്‍വീസ് റോഡിനോട് ചേര്‍ന്ന് നിര്‍മിച്ച കാനകള്‍ക്ക് മുകളിലെ സ്ലാബുകള്‍ തകരുന്നതും വാഹനങ്ങള്‍ കുഴിയില്‍പ്പെടുന്നതും പതിവാണ്‌. ഇത്‌ ഗതാഗതക്കുരുക്ക്‌ കൂടുതൽ രൂക്ഷമാക്കുന്നു. ഗുണനിലവാരമില്ലാത്ത സ്ലാബുകൾ സ്ഥാപിച്ചതാണ്‌ സ്ഥിതി മോശമാക്കിയത്‌. ചെറിയ കമ്പികളിട്ട സ്ലാബുകള്‍ക്ക് മുകളിലൂടെ ഇരുചക്ര വാഹനങ്ങള്‍ കടന്നാല്‍ പോലും തകരുന്ന അവസ്ഥയാണ്. നിർമാണ പ്രവൃത്തികൾ വളരെ പതുകെയാണ്‌ നടക്കുന്നത്‌. കൂടുതൽ ജീവനക്കാരെ എത്തിച്ച്‌ പ്രവൃത്തി വേഗത്തിൽ പൂർത്തിയാക്കാമെന്ന്‌ ദേശീയപാത അധികൃതർ അറിയിച്ചിരുന്നുവെങ്കിലും ഇതുവരെ നടപ്പാക്കിയിട്ടില്ല.