കുടുംബശ്രീ സിഡിഎസ്‌ ഐഎസ്‌ഒ പ്രഖ്യാപനം

തൃശൂർ

അർഹതയ്ക്കുള്ള അംഗീകാരമായി ജില്ലയിലെ 49 കുടുംബശ്രീ സിഡിഎസുകൾ ഐഎസ്ഒ സർട്ടിഫിക്കേഷൻ കരസ്ഥമാക്കി. ഉപഭോക്തൃ സംതൃപ്തിയും തുടർച്ചയായ പുരോഗതിയും വർധിപ്പിക്കുന്നതിൽ നൽകുന്ന ഗുണനിലവാരത്തിന്റെ അന്താരാഷ്ട്ര മുദ്രയാണ് തൃശൂരിലെ 49 കുടുംബശ്രീ സിഡിഎസുകളെ തേടിയെത്തിയത്. ഓഫീസുകളിലെ ഫയൽ ക്രമീകരണം, സാമ്പത്തിക പ്രവർത്തനങ്ങൾ, അയൽക്കൂട്ട വിവരങ്ങൾ ഇടപാടുകൾ, രജിസ്റ്ററുകളും പരിപാലനവും, കൃത്യമായ ഓഫീസ് ക്രമീകരണം, സേവനമേഖലയിലെ വിലയിരുത്തൽ, കാര്യക്ഷമത, പൊതുജനങ്ങൾക്ക് നൽകുന്ന സേവനങ്ങൾ, ഹെൽപ്പ് ഡെസ്ക് സംവിധാനം തുടങ്ങിയ സൂചകങ്ങളെ അടിസ്ഥാനമാക്കിയാണ് കുടുംബശ്രീ ഐഎസ്ഒ 9001:20159- അംഗീകാരം നേടുന്നത്. സംസ്ഥാനതലത്തിൽ ആദ്യം ഐഎസ്ഒ അംഗീകാരം നേടിയ ജില്ലയും തൃശൂർ ആയിരുന്നു. മൂന്നുവർഷം കാലാവധിയുള്ള സർട്ടിഫിക്കേഷൻ ജില്ലയിലെ 44 സിഡിഎസുകളും അഞ്ച് നഗര സിഡിഎസുകളുമാണ് ആദ്യഘട്ടത്തിൽ കരസ്ഥമാക്കിയത്. സിഡിഎസുകളുടെ ഐഎസ്‌ഒ പ്രഖ്യാപനം മന്ത്രി കെ രാജന്‍ ഉദ്‌ഘാടനം ചെയ്‌തു. പി ബാലചന്ദ്രൻ എംഎൽഎ അധ്യക്ഷനായി. ജില്ലാ പഞ്ചായത്ത് പ്രസിഡന്റ് വി എസ് പ്രിൻസ് മുഖ്യാതിഥിയായി. കോർപറേഷൻ ഡെപ്യൂട്ടി മേയർ എം എൽ റോസി, സ്റ്റാൻഡിങ് കമ്മിറ്റി ചെയർമാൻ പി കെ ഷാജൻ, കുടുംബശ്രീ ഗവേണിങ് ബോഡി അംഗം കെ ആർ ജോജോ, വടക്കാഞ്ചേരി നഗരസഭാ വൈസ് ചെയർപേഴ്സൺ ഷീല മോഹൻ, കൗൺസിലർ റെജി ജോയ്, കില സീനിയർ മാനേജർ കെ ശ്രീരിഷ, ലീഡ് കോ–ഓര്‍ഡിനേറ്റർ സി എം പ്രേമാനന്ദ്, സിഡിഎസ് ചെയർപേഴ്സൺമാരായ സത്യഭാമ വിജയൻ, റെജൂല കൃഷ്ണകുമാർ, ജില്ലാ മിഷൻ കോ-ഓർഡിനേറ്റർ കെ രാധാകൃഷ്ണൻ, കുടുംബശ്രീ അസിസ്റ്റന്റ് ജില്ലാ മിഷൻ കോ–ഓര്‍ഡിനേറ്റർ കെ കെ പ്രസാദ് എന്നിവർ സംസാരിച്ചു.