മഹിളാ കോണ്‍ഗ്രസ് നേതാവ്‌ ജ്യോതി ശശി 
സിപിഐ എമ്മുമായി സഹകരിക്കും

വടക്കേക്കാട്

മഹിളാ കോണ്‍ഗ്രസ് നേതാവും വടക്കേക്കാട് പഞ്ചായത്ത് മുൻ പ്രസിഡന്റുമായിരുന്ന ജ്യോതി ശശി കോണ്‍ഗ്രസ്‌ ബന്ധം ഉപേക്ഷിച്ചു. ഇനി സിപിഐ എമ്മുമായി സഹകരിക്കും. വൈ ലത്തൂർ, നായരങ്ങാടി വാർഡുകളിലായി 2005, 2010 വര്‍ഷങ്ങളില്‍ വിജയിച്ചിരുന്നു. 2005–ൽ പ്രസിഡന്റും 2010–ൽ വൈസ് പ്രസിഡന്റുമായിരുന്നു. രണ്ട് ദശകങ്ങള്‍ക്ക് മുന്പ് തുടക്കം കുറിച്ച പദ്ധതികള്‍ പോലും യാഥാര്‍ഥ്യമാക്കാനാകാത്ത കോണ്‍ഗ്രസ് ഭരണസമിതിക്കെതിരെ നിരന്തരമായി വിമര്‍ശനം ഉന്നയിച്ചിരുന്നു. എന്നാൽ വികസന പ്രവര്‍ത്തനങ്ങള്‍ക്ക് നേതൃത്വം നല്‍കാതിരിക്കുകയും നാടിനെ ബാധിക്കുന്ന വിഷയങ്ങളില്‍ കേരളത്തിനെതിരായി നിലപാട് സ്വീകരിക്കുകയും ചെയ്യുന്ന കോൺഗ്രസ്‌ നടപടിയിൽ പ്രതിഷേധിച്ചാണ് പാർടി വിടുന്നതെന്ന്‌ ജ്യോതി ശശി പറഞ്ഞു. എന്‍ കെ അക്ബര്‍ എംഎല്‍എ സ്വീകരണ യോഗം ഉദ്ഘാടനം ചെയ്തു. സിപിഐ എം വൈലത്തൂര്‍ ലോക്കല്‍ സെക്രട്ടറി വി വി വിനോദ്, പ്രേംരാജ് ഞമനേങ്ങാട്, എ എം ഫൈസൽ, ഗിരീഷ് കച്ചേരിപ്പടി, വിജയൻ അഞ്ഞൂർ എന്നിവർ സംസാരിച്ചു.