ഉരുളൻ പൈപ്പുകൾക്ക്‌ വിട,
ബസ് കാത്ത്‌ ഇനി നിവർന്നിരിക്കാം

കൊടുങ്ങല്ലൂർ
ബസ് കാത്തിരിപ്പ് കേന്ദ്രത്തിലെ ഉരുണ്ട സ്റ്റീൽ പൈപ്പിൽ ഇരിക്കുമ്പോഴുള്ള അസ്വസ്ഥതക്ക് പരിഹാരമായി. കൺസ്യൂമേഴ്സ് ഫോറം സെക്രട്ടറി സി എസ് തിലകൻ തദ്ദേശ സ്വയംഭരണ മന്ത്രി എം ബി രാജേഷിന് നൽകിയ നിവേദനത്തെ ത്തുടർന്നാണ്‌ നടപടിയായത്‌. കൊടുങ്ങല്ലൂർ നഗരത്തിലെ നാല് ബസ്‌ കാത്തിരുപ്പ് കേന്ദ്രത്തിലെ ഉരുണ്ട സ്റ്റീൽ പൈപ്പ് ഇരിപ്പിടങ്ങളാണ്‌ മാറ്റിസ്ഥാപിച്ചത്. രണ്ടുവർഷം മുമ്പാണ്‌ നഗരത്തിൽ ആധുനിക രീതിയിൽ ബസ്‌ കാത്തിരുപ്പ് കേന്ദ്രങ്ങൾ നിർമിച്ചത്‌. യാത്രക്കാർക്ക് ഇരിക്കാൻ ഉരുണ്ട പൈപ്പ് സ്ഥാപിച്ചതിലെ അശാസ്ത്രീയതയും അസൗകര്യവും ചൂണ്ടിക്കാട്ടി സൗകര്യപ്രദമായ ഇരിപ്പിടം ഒരുക്കാൻ നിർദേശം നൽകണമെന്ന് അഭ്യർഥിച്ചാണ്‌ സി എസ് തിലകൻ മന്ത്രി എം ബി രാജേഷിന് നിവേദനം നൽകിയത്‌. നിവേദനം പരിഗണിച്ച് മന്ത്രിയുടെ നിർദേശ പ്രകാരം വകുപ്പ് പ്രിൻസിപ്പൽ സെക്രട്ടറി ഉരുണ്ട സ്റ്റീൽ പൈപ്പുകൾ മാറ്റി സൗകര്യപ്രദമായ ഇരിപ്പിടം ഒരുക്കാൻ തദ്ദേശ സ്വയംഭരണ സ്ഥാപനങ്ങൾക്ക് നിർദേശം നൽകി. ഉത്തരവ് ലഭിച്ചിട്ടും നടപ്പിലാക്കാത്ത സാഹചര്യത്തിൽ സി എസ് തിലകൻ ഇക്കാര്യം കൊടുങ്ങല്ലൂർ നഗരസഭാ ചെയർപേഴ്സൺ ടി കെ ഗീത, സെക്രട്ടറി വ്രജ എന്നിവരുടെ ശ്രദ്ധയിൽപ്പെടുത്തി. തുടർന്നാണ് നഗരത്തിലെ നാല് ബസ്‌ കാത്തിരുപ്പ് കേന്ദ്രങ്ങളിലെ പൈപ്പുകൾ മാറ്റി സൗകര്യപ്രദമായ ഇരിപ്പിടം ഒരുക്കിയത്.