വിങ്‌സ്‌ ഓഫ് വട്ടിയൂർക്കാവ്– കലാജാഥയ്ക്ക് തുടക്കമായി

വട്ടിയൂർക്കാവ്

പരിസ്ഥിതി സംഘടനയായ ഗ്രീൻ ആർമിയും വട്ടിയൂർക്കാവ് യൂത്ത് ബ്രിഗേഡും (വൈബ്) ചേർന്ന്‌ സംഘടിപ്പിക്കുന്ന ‘വിങ്‌സ്‌ ഓഫ് വട്ടിയൂർക്കാവ്’ കലാജാഥയ്ക്കു തുടക്കമായി. മന്ത്രി എം ബി രാജേഷ് ഉദ്ഘാടനം ചെയ്തു. വി കെ പ്രശാന്ത് എംഎൽഎ അധ്യക്ഷനായി. ലഹരി, മാലിന്യ പരിപാലനം, കുട്ടികൾക്കെതിരെയുള്ള അതിക്രമങ്ങൾ തുടങ്ങിയവ വിഷയമാക്കിയാണ്‌ ജാഥ സംഘടിപ്പിക്കുന്നത്‌. കേരള ലോ അക്കാദമി, ഇൻഡസ് സൈക്ലിങ്‌ എംബസി, സെൻട്രൽ പോളിടെക്നിക് കോളേജ് എൻഎസ്എസ് യൂണിറ്റ്, പാവനാടക കലാകാരൻ സുനിൽ പട്ടിമറ്റം എന്നിവരുടെ സഹകരണത്തോടെയാണ് ജാഥ നടത്തുന്നത്. കടകംപള്ളി സുരേന്ദ്രൻ എംഎൽഎ, ട്രിഡ ചെയർമാൻ കെ സി വിക്രമൻ, നഗരസഭ ഡെപ്യൂട്ടി മേയർ പി കെ രാജു, കൗൺസിലർമാരായ അംശു വാമദേവൻ, ജമീല ശ്രീധരൻ, മുൻമന്ത്രി എം വിജയകുമാർ, കനറ ബാങ്ക് ജനറൽ മാനേജർ എസ് സുനിൽകുമാർ, വൈലോപ്പിള്ളി സംസ്കൃതി ഭവൻ വൈസ് ചെയർമാൻ ജി എസ് പ്രദീപ്, മജീഷ്യൻ രാജ് കലേഷ്, റിട്ട. ഡിജിപി ഋഷിരാജ് സിങ്‌, ചലച്ചിത്രതാരം ജോബി എന്നിവർ വിവിധ കേന്ദ്രങ്ങളിൽ സംസാരിച്ചു. ശനി വൈകിട്ട്‌ 6.30ന് പേരൂർക്കട ജങ്‌ഷനിൽ കലാജാഥ സമാപിക്കും. സമാപന സമ്മേളനം മന്ത്രി വി ശിവൻകുട്ടി ഉദ്ഘാടനം ചെയ്യും.