നഗരസഭ മാജിക്ക്‌ മാലിന്യക്കുന്നല്ല, 
മനോഹരമായ പാർക്ക്‌

കഴക്കൂട്ടം

കാടുമൂടി, മാലിന്യക്കൂമ്പാരങ്ങൾ ചീഞ്ഞുനാറി ദുരിതക്കയമായിരുന്ന ഇടം ഇന്ന്‌ മനസ്സ്‌ കുളിർപ്പിക്കുന്ന പാർക്ക്‌. പൗണ്ട്കടവ് വാർഡിൽ പൗണ്ട്കടവ് മുതൽ സ്റ്റേഷൻകടവ് വരെയുള്ള റോഡിന് ഇടതുവശത്തുള്ള ഒരു കിലോമീറ്ററാണ്‌ നഗരസഭയുടെ വിവേകപൂർണമായ ഇടപെടലിൽ എ പി ജെ അബ്ദുൽ കലാം പാർക്കായി മാറിയത്‌. ഇന്ന്‌ ഇവിടം ​കുട്ടികൾക്കും മുതിർന്നവർക്കും ഒരേപോലെ മാനസികോല്ലാസം നൽകുന്ന ഒരിടമാണ്. ടെക്കികളും വിഎസ്എസ്‌സി ജീവനക്കാരും പൊതുജനങ്ങളും സായാഹ്നങ്ങളിൽ സമയം ചെലവഴിക്കാനും സമ്മർദങ്ങൾ ലഘൂകരിക്കാനും വ്യായാമത്തിനുമായി എത്തുന്നു. ​ വിഎസ്എസ്‌സിയുടെ ഉടമസ്ഥതയിലായിരുന്ന 16 സെന്റാണ്‌ നഗരസഭ ഏറ്റെടുത്തത്‌. 5.5 കോടി രൂപയിൽ മനോഹരമായ പാർക്ക് നിർമിച്ചു. ​തണൽ മരങ്ങൾ, ഇരിപ്പിടങ്ങൾ, കല്ലുപാകിയ മനോഹരമായ നടപ്പാതകൾ, വ്യായാമത്തിനുള്ള സ്ഥലങ്ങൾ, കുട്ടികൾക്കുള്ള പാർക്ക്‌, അപൂർവയിനം ഔഷധച്ചെടികൾ, പൂന്തോട്ടം, 750 മീറ്റർ സൈക്കിൾ ട്രാക്ക്, വാക് വേ, ഓപ്പൺ ജിം, ടോയ്‌ലറ്റ് ബ്ലോക്കുകൾ... ആരെയും കൊതിപ്പിക്കുന്ന മനോഹര ഇടമായി പ്രദേശത്തെ നഗരസഭ മാറ്റി. രണ്ട് പ്രവേശന കവാടങ്ങളാണ്‌ പാർക്കിനുള്ളത്‌. ചുറ്റിനും ഗാബിയോൺ മതിൽവേലി. പാർക്കിന് ഇടതുവശത്ത് പാർവതി പുത്തനാറും വലതുവശത്തായി തീരദേശ പാതയും അതിനു സമീപത്തായി റെയിൽവേ പാതയുമാണ്‌. കടകംപള്ളി സുരേന്ദ്രൻ മന്ത്രിയായിരിക്കെ കല്ലിട്ട പാർക്ക് 2022 ജൂലൈ 27ന് മേയർ ആര്യ രാജേന്ദ്രനാണ്‌ ഉദ്ഘാടനം ചെയ്തത്‌.