വിദ്യാഭ്യാസ റിയാലിറ്റി ഷോയില്‍ 7 സ്കൂള്‍

തിരുവനന്തപുരം

പൊതുവിദ്യാഭ്യാസമേഖലയിലെ മികവുകൾ രാജ്യത്തിനുമുന്നിൽ അവതരിപ്പിക്കുന്ന കേരള ഇൻഫ്രാസ്ട്രക്ചർ ആൻഡ്‌ ടെക്നോളജി ഫോർ എഡ്യുക്കേഷൻ (കൈറ്റ്) സംഘടിപ്പിക്കുന്ന ‘ഹരിതവിദ്യാലയം' വിദ്യാഭ്യാസ റിയാലിറ്റി ഷോയുടെ നാലാം എഡിഷന്റെ പ്രാഥമിക പട്ടികയില്‍ ജില്ലയിൽനിന്ന്‌ ഏഴ്‌ വിദ്യാലയം. സംസ്ഥാനതലത്തിൽ 85 വിദ്യാലയങ്ങളാണുള്ളത്‌. ഗവ. എച്ച്എസ്‌എസ്‌ തോന്നയ്ക്കല്‍, സെന്റ‍ മേരീസ് എച്ച്എസ്‌എസ്‌ പട്ടം, ഗവ. എച്ച്എസ്‌എസ്‌ വെ‍ഞ്ഞാറമൂട്, ഗവ. മോഡല്‍ എച്ച്എസ്‌എസ്‌ വര്‍ക്കല, ഗവ. യുപിഎസ്‌ വിതുര, ഗവ. എല്‍പിഎസ്‌ ആനാട്, ഗവ. എല്‍പിഎസ്‌ കോട്ടണ്‍ഹില്‍ എന്നീ വിദ്യാലയങ്ങളെയാണ് തെരഞ്ഞെടുത്തത്. സ്കൂളുകൾ നടത്തുന്ന ക്രിയാത്മകവും മാതൃകാപരവുമായ പ്രവർത്തനങ്ങളെ അംഗീകരിക്കുകയും മറ്റ്‌ വിദ്യാലയങ്ങൾക്കുകൂടി പങ്കുവച്ച് പൊതുവിദ്യാഭ്യാസത്തിന്റെ നിലവാരം ഉയർത്തുകയുമാണ് റിയാലിറ്റി ഷോയുടെ ലക്ഷ്യം. പരിപാടിയുടെ ഫ്ലോർ ഷൂട്ട് തിരുവനന്തപുരം കൈറ്റ് സ്റ്റുഡിയോയില്‍ ഡിസംബര്‍ 26 മുതല്‍ ആരംഭിക്കും. കൈറ്റ് വിക്ടേഴ്സിൽ ഷോയുടെ സംപ്രേഷണം ജനുവരി ആദ്യംമുതല്‍ ആരംഭിക്കും. അവസാന റൗണ്ടിലേക്ക് തെരഞ്ഞെടുക്കുന്ന പത്ത് സ്കൂളുകൾക്കും വിജയികൾക്കും ഫെബ്രുവരിയിൽ നടക്കുന്ന ഗ്രാൻഡ്‌ ഫിനാലെയിൽ അവാർഡുകൾ സമ്മാനിക്കും. ഓൺലൈനായി നടത്തിയ യോഗത്തിൽ തെരഞ്ഞെടുത്ത വിദ്യാലയങ്ങളുമായി കൈറ്റ് സിഇഒ കെ അന്‍വ‌ർസാദത്ത് ആശയവിനിമയം നടത്തി. ജില്ലാ കോ- ഓർഡിനേറ്റർ ജി എസ്‌ ബിന്ദു പങ്കെടുത്തു.