പുരസ്‌കാരനിറവിൽ വീയപുരം

ഹരിപ്പാട്

സംസ്ഥാന സർക്കാരിന്റെ പ്രധാന പദ്ധതികളിലൊന്നായ ‘മാലിന്യമുക്ത നവകേരളം’ മികച്ച രീതിയിൽ നടപ്പാക്കിയാണ്‌ വീയപുരം പഞ്ചായത്ത്‌ ശ്രദ്ധേയമായത്‌. ശുചിത്വ, മാലിന്യസംസ്‌കരണ പദ്ധതികൾ മാതൃകാപരം. അജൈവ മാലിന്യ സംസ്കരണത്തിനായി മെറ്റീരിയൽ കളക്‌ഷൻ സെന്റർ, സോർട്ടിങ്, ബെയിലിങ്‌ സംവിധാനങ്ങൾ, ഇലക്ട്രിക് ഓട്ടോ, ഹരിത കർമസേനയുടെ സമ്പൂർണ വാതിൽപ്പടി സേവനം എല്ലാ അങ്കണവാടികളിലും സ്കൂളുകളിലും മലിനജല സംസ്കരണ സംവിധാനം, പായിപ്പാട് ജലോത്സവ പവലിയനിൽ ശുചിമുറി സമുച്ചയം, എയ്‌റോബിക്‌ കമ്പോസ്റ്റ് യൂണിറ്റ്, സാനിറ്ററി നാപ്കിൻ സംസ്‌കരണ സംവിധാനം എന്നിവ പഞ്ചായത്ത്‌ ഏറ്റവും മികച്ച രീതിയിൽ നടപ്പാക്കി. അടിസ്ഥാനസൗകര്യ വികസനത്തിൽ സംസ്ഥാനത്തെ മികച്ച പഞ്ചായത്തിന്‌ ഏർപ്പെടുത്തിയ സ്വരാജ് ട്രോഫിയും രാജ്യത്ത് മികച്ച പഞ്ചായത്തിന്‌ ദീൻദയാൽ ഉപാധ്യായ ദേശീയ പുരസ്‌കാരവും നേടി. ജനകീയാസൂത്രണ പദ്ധതിയിലൂടെ പുതിയൊരു വികസന സംസ്കാരം സൃഷ്ടിച്ചെടുക്കുന്നതിൽ വീയപുരം മികച്ച മാതൃകയായി. വിദ്യാഭ്യാസ മേഖലയിലും ശ്രദ്ധേയമായ ഇടപെടലുകളുണ്ടായി. പഠനോപകരണങ്ങൾ, പഠനമുറി ലാപ്ടോപ്പ്, സ്കോളർഷിപ്പ്, കുട്ടികൾക്ക് പ്രഭാത ഭക്ഷണം എന്നിവയും സ്കൂളുകളിലെ അടിസ്ഥാന വികസന പദ്ധതികളും നടപ്പാക്കി.