വിമതപത്‌മവ്യൂഹത്തിൽ 
യുഡിഎഫ്‌

ആലപ്പുഴ

വിമതരുടെ പത്‌മവ്യൂഹത്തിലാണ്‌ ജില്ലയിൽ യുഡിഎഫ്‌. തുടക്കംമുതൽ സ്വയംപ്രഖ്യാപിത സ്ഥാനാർഥികൾ കളത്തിലിറങ്ങി. പത്രിക സമർപ്പണത്തിലും ഇതുകണ്ടു. കോൺഗ്രസിൽ തന്നെ ഒന്നിലേറെപ്പേർ പലവാർഡിലും വാശിയോടെ പത്രിക സമർപ്പിച്ചു. ഉന്നതർ അന്ത്യശാസനം നൽകിയിട്ടും ഫലമുണ്ടായില്ല. ആലപ്പുഴ നഗരസഭയിലെ മൂന്നു വാർഡിലാണ്‌ കോൺഗ്രസിന് റിബൽ. ഒരു വാർഡിൽ ആർഎസ്‌പി സ്ഥാനാർഥിക്കെതിരെ കോൺഗ്രസ് സ്ഥാനാർഥി പാർടി ചിഹ്നത്തിൽ മൽസരിക്കുന്നു. പുന്നമടവാർഡിൽ കോൺഗ്രസ് ഔദ്യോഗിക സ്ഥാനാർഥി കെ എ സാബുവിനെതിരെ വിമതനായി മൽസരിക്കുന്നത് കോൺഗ്രസ് വാർഡ് പ്രസിഡന്റ്‌ കെ ഇ ജോഷിയാണ്. വാർഡുകമ്മിറ്റി തീരുമാനം അവഗണിച്ച് പുറത്തുനിന്ന്‌ കെ എ സാബുവിനെ സ്ഥാനാർഥിയാക്കിയതിനെതിരെ കമ്മിറ്റി ഒന്നടങ്കം കോൺഗ്രസിൽനിന്ന് രാജിവച്ച് ജോഷിയെ സ്ഥാനാർഥിയാക്കി. തുമ്പോളി വാർഡിൽ മുൻ കൗൺസിലർകൂടിയായ നിശാന്താണ് കോൺഗ്രസ് സ്ഥാനാർഥിയും മണ്ഡലം പ്രസിഡന്റുമായ പി ജെ ബെർളിക്കെതിരെയുള്ള വിമതൻ. കളപ്പുര വാർഡിൽ കോൺഗ്രസ് ഔദ്യോഗിക സ്ഥാനാർഥിക്കെതിരെ മത്സരിക്കുന്നത് മുൻ കൗൺസിലർ രാജു താന്നിക്കലാണ്. ഡിസിസി ജനറൽ സെക്രട്ടറി സ്ഥാനം രാജിവച്ചാണ് രാജു റിബലായത്. ​ കാഞ്ഞിരംചിറ വാർഡിൽ സീറ്റ് നിഷേധിച്ചതിൽ പ്രതിഷേധിച്ച് മുൻ കോൺഗ്രസ് മണ്ഡലം സെക്രട്ടറി രാഹുൽ രാജിവച്ചു. കായംകുളം നഗരസഭയിൽ 20-ാം വാർഡിൽ കോൺഗ്രസിലെ ബിധു രാഘവനെതിരെ കോൺഗ്രസിലെതന്നെ ഷാനവാസ്‌ മത്സരത്തിനുണ്ട്‌. 18-ാം വാർഡിൽ കോൺഗ്രസ്‌ സ്ഥാനാർഥിയായ സൗമ്യയുടെ പത്രിക തള്ളിയതും തിരിച്ചടിയായി. മാവേലിക്കര തെക്കേക്കര പഞ്ചായത്തിൽ അഞ്ച്‌, ചിങ്ങോലി പഞ്ചായത്തിൽ മൂന്ന്‌, തൃക്കുന്നപ്പുഴയിൽ രണ്ട്‌, മുഹമ്മ, മണ്ണഞ്ചേരി, പുറക്കാട്‌, കൈനകരി, പുളിങ്കുന്ന്‌, പത്തിയൂർ, മാന്നാർ, പാണ്ടനാട്‌, പുലിയൂർ, ചെങ്ങന്നൂർ, ചുനക്കര, മുതുകുളം, ആറാട്ടുപുഴ, കാർത്തികപ്പള്ളി, തഴക്കര ഒന്നു വീതം വിമതർ മത്സരരംഗത്തുണ്ട്‌.​