മാന്യമഹാജനങ്ങളേ, 
കഥ തുടങ്ങുകയാണ്‌

ഹരിപ്പാട്‌

നാവുപടവാളാക്കി നാടിന്റെ നായികയാകാൻ ലക്ഷ്‌മി. ഹരിപ്പാട് ബ്ലോക്ക് പഞ്ചായത്ത് കരുവാറ്റ വടക്ക് ഡിവിഷനിലാണ്‌ കഥാപ്രസംഗകലയുടെ അകംപൊരുൾ തേടുന്ന ഇ‍ൗ കലാകാരിയെ എൽഡിഎഫ്‌ മത്സരത്തിനിറക്കിയത്‌. എം എ, എംഫിൽ, കഥാപ്രസംഗ പഠന ഡിപ്ലോമ, യുജിസി നെറ്റ്‌ എന്നിവ നേടിയ കരുവാറ്റ വടക്ക്‌ കൊട്ടാരത്തിൽ ലക്ഷ്‌മി ശിവൻ കാലടി സംസ്കൃത സർവകലാശാലയിൽ ഗവേഷകയാണ്‌. വി സാംബശിവന്റെ ഇരുപതാം നൂറ്റാണ്ടെന്ന കഥാപ്രസംഗത്തെ ആസ്‌പദമാക്കി "കഥാപ്രസംഗം കലയും പ്രതിരോധവും' എന്ന പഠനത്തിന്‌ 2021ൽ എംഫിൽ നേടി. ബെന്യാമിന്റെ "ആടുജീവിതം', ഒ വി വിജയന്റെ "കടൽ തീരത്ത്’, ഇന്ത്യ-പാക് വിഭജനം വിഷയമാക്കിയ "മാനിഷാദ' എന്നിവയടക്കം നിരവധി കഥകൾ കഥാപ്രസംഗമായി അവതരിപ്പിച്ചു. ദേശീയ -അന്തർദേശീയ തലത്തിൽ സെമിനാറുകളിൽ നിരവധി പ്രബന്ധങ്ങൾ അവതരിപ്പിച്ചു. സാംസ്‌കാരിക വകുപ്പിന്റെ വജ്രജൂബിലി ഫെലോഷിപ് നേടി. 2014ൽ ജില്ലാ സ്‌കൂൾ കലോത്സവത്തിൽ മതസൗഹാർദം പ്രമേയമാക്കിയ എന്റെ ഗ്രാമം അവതരിപ്പിച്ചാണ്‌ കഥാപ്രസംഗ മേഖലയിലേക്ക് കടന്നത്‌. സ്‌കൂൾ, കോളേജ്‌, സർവകലാശാല കലോത്സവങ്ങളിൽ സമ്മാനങ്ങൾ നേടി. വിവിധ സാംസ്‌കാരിക വേദികളിലും പ്രൊഫഷണലായി കഥാപ്രസംഗം അവതരിപ്പിക്കാറുണ്ട്‌. സമൂഹത്തിലെ പ്രശ്‌നങ്ങളും പ്രതിരോധവുമാണ്‌ കഥയായി പറയുക. കൊടും ചൂഷണങ്ങളുടെയും അടിച്ചമർത്തലുകളുടെയും ചരിത്രകഥകളും പാഠങ്ങളും പകരുന്ന തനിക്ക്‌ സാധാരണക്കാരുടെ ജീവൽപ്രശ്‌നങ്ങൾ വേഗം മനസിലാക്കാൻ കഴിയുമെന്ന്‌ ലക്ഷ്‌മി പറഞ്ഞു. എസ്എഫ്ഐ, ഡിവൈഎഫ്ഐ പ്രവർത്തകയായ ലക്ഷ്‌മി സിപിഐ എം അംഗമാണ്.