ക്ലാസ്‌മുറി ഇനി ‘സോ സ്‌മാർട്ട്‌’

മങ്കൊമ്പ് ​

നീലംപേരൂർ പഞ്ചായത്തിലെ നാലാം വാർഡില്‍ ഗവ. ആർവി എൽപി സ്‌കൂളിൽ പഠനം കൂടുതൽ രസകരമാക്കാൻ ഇനി സ്‌മാർട്ട്‌ ക്ലാസ്‌മുറിയും. വികസനപ്രവർത്തനങ്ങളുടെ ഭാഗമായി പ്ലാൻഫണ്ടിൽനിന്ന് 2,84,000 രൂപ മുടക്കിയാണ്‌ സ്‌മാർട്ട് ക്ലാസ്‌മുറി തുറന്നത്‌. പഞ്ചായത്തിലെ വിദ്യാർഥികൾക്ക് പഠനത്തിൽ സാങ്കേതികവിദ്യയുടെ സഹായമുറപ്പിക്കാൻ ഇതിലൂടെ പഞ്ചായത്തിനായെന്ന് പഞ്ചായത്ത് പ്രസിഡന്റ്‌ ടി കെ തങ്കച്ചൻ പറഞ്ഞു. ശീതീകരിച്ച മുറിയില്‍ ലാപ്ടോപ്പ്, ഡിജിറ്റൽ റൈറ്റിങ് ബോർഡ്, ശിശുസൗഹൃദ ഇരിപ്പിടങ്ങൾ എന്നിവയെല്ലാം ഒരുക്കിയിട്ടുണ്ട്. ആകെ 52 കുട്ടികളാണ്. 16 വിദ്യാർഥികൾ പഠിക്കുന്ന നാലാം ക്ലാസിലാണ് സ്‌മാർട്ട്‌ ക്ലാസ്‌മുറി. പുതിയ മാറ്റത്തിലൂടെ വിദ്യാർഥികളുടെ അടിസ്ഥാനസൗകര്യങ്ങൾ മെച്ചപ്പെടുത്തുക മാത്രമല്ല സാങ്കേതികവിദ്യയുടെ സഹായത്തോടെ പ്രായോഗിക അറിവ് നേടാനുള്ള അവസരമൊരുക്കുകകൂടിയാണ് ലക്ഷ്യം.