താക്കീതായി വഴിയോര കച്ചവട തൊഴിലാളികളുടെ പ്രതിഷേധം

ആലപ്പുഴ

മാനദണ്ഡങ്ങൾ ലംഘിച്ച്‌ വഴിയോര കച്ചവടക്കാരെ​ കുടിയൊഴിപ്പിക്കുന്ന ഭരണാധികാരികൾക്ക്‌ താക്കീതായി തൊഴിലാളി പ്രതിഷേധം. ജില്ല​ വഴിയോര കച്ചവട തൊഴിലാളി യൂണിയൻ (സിഐടിയു) നേതൃത്വത്തിൽ കലക്​ടറേറ്റിലേക്ക്‌ സംഘടിപ്പിച്ച ​ മാർച്ചിലും ധർണയിലും നൂറുകണക്കിന്‌ തൊഴിലാളികൾ പങ്കെടുത്തു. അനാവശ്യകുടിയൊഴിപ്പിക്കൽ അവസാനിപ്പിക്കുക, തെരുവോരകച്ചവട നിയമം സമഗ്രമായി നടപ്പാക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു​ സമരം. അധികൃതർ ദ്രോഹനടപടികൾ തുടരുകയാണെങ്കിൽ പ്രക്ഷോഭം കൂടുതൽ ശക്‌തമാക്കുമെന്ന്‌ യൂണിയൻ വ്യക്തമാക്കി. സിഐടിയു സംസ്ഥാനസെക്രട്ടറി പി ഗാനകുമാർ ഉദ്​ഘാടനംചെയ്‌തു. പ്രസിഡന്റ്‌​ പി ഡി സുനീഷ്​കുമാർ അധ്യക്ഷനായി. സിഐടിയു ജില്ലാ പ്രസിഡന്റ്‌ എച്ച്‌ സലാം, യൂണിയൻ ജനറൽസെക്രട്ടറി എം സുനിൽകുമാർ, ട്രഷറർ പി കെ ഫൈസൽ, ഷീല ജെയിംസ്​, എൻ സജീർ, ടി എ നാസർ എന്നിവർ സംസാരിച്ചു.