99.63% മധുര വിജയം

ആലപ്പുഴ

എസ്​എസ്എൽസി പരീക്ഷയിൽ​ 99.63 ശതമാനത്തിന്റെ മിന്നും വിജയം നേടി ജില്ല. 10,221 ആൺകുട്ടികളും 10,021 പെൺകുട്ടികളും ഉൾപ്പെടെ 20,242 കുട്ടികളാണ്​ പരീക്ഷയെഴുതിയത്​. ഇതിൽ 10,178 ആൺകുട്ടികളും 9,989 ​പെൺകുട്ടികളും ഉൾപ്പെടെ 20,167 ​പേർ ഉപരിപഠനത്തിന്​ അർഹതനേടി. കഴിഞ്ഞവർഷം ജില്ലയിൽ 99.7 ശതമാനമായിരുന്നു വിജയം. ഇത്തവണ 0.07 ശതമാനത്തിന്റെ നേരിയകുറവുണ്ട്​. എ പ്ലസുകാരുടെ എണ്ണത്തിലും വർധനവില്ല. വിജയശതമാനത്തിൽ സംസ്ഥാനത്ത് ജില്ല നാലാംസ്ഥാനം നിലനിർത്തി. സംസ്ഥാനത്ത് ഏറ്റവുംകുറവ് വിദ്യാര്‍ഥികൾ പരീക്ഷയെഴുതിയ കുട്ടനാട്ടിൽ​ (1,787) എല്ലാവരും വിജയിച്ച്‌ സംസ്ഥാനത്ത്​ ഏറ്റവും കൂടുതൽ വിജയശതമാനം നേടിയ വിദ്യാഭ്യാസജില്ലയായി. കഴിഞ്ഞതവണയും കുട്ടനാട്‌ നൂറുശതമാനം നേടിയിരുന്നു. സംസ്ഥാനത്ത്‌ ഒരാൾ മാത്രം പരീക്ഷയെഴുതിയ മൂന്നു സ്കൂളുകളിൽ ജില്ലയിലെ തലവടി ഗവ. വി എച്ച്‌ എസ്‌ എസിലെ വിദ്യാർഥിയും വിജയിച്ചു.