മേഘ, പരേഡിലേക്കൊരു കുട്ടനാടൻ പവർ

തകഴി

റിപ്പബ്ലിക് ദിന പരേഡിൽ കേരളത്തിൽനിന്ന്‌ ഏക വനിത കായികതാര സാന്നിധ്യമാകാൻ കായൽനാടിന്റെ പുത്രി മേഘ പ്രദീപ്. കനോയിങ് കായിക രംഗത്ത് അന്താരാഷ്ട്ര തലത്തിൽ ഇന്ത്യയുടെ അഭിമാനമുയർത്തിയ മികച്ച പ്രകടനമാണ് പരേഡിൽ പങ്കെടുക്കാനുള്ള അവസരം മേഘയ്ക്ക് നേടിക്കൊടുത്തത്. 2024-ൽ ജപ്പാനിലെ ടോക്കിയോയിൽ നടന്ന ഏഷ്യൻ കനോ സ്‌പ്രിന്റ് ആൻഡ് ഒളിമ്പിക് ക്വാളിഫയിങ് ചാമ്പ്യൻഷിപ്പിൽ 500 മീറ്റർ കനോയിങ് സിംഗിൾസിൽ വെങ്കലം നേടിയിട്ടുണ്ട്‌. 11 വർഷത്തെ ഇടവേളയ്ക്ക് ശേഷമാണ് ഈ വിഭാഗത്തിൽ ഇന്ത്യ ഒരു അന്താരാഷ്ട്ര മെഡൽ സ്വന്തമാക്കുന്നത്. ​ കുട്ടനാട് കൈനകരി പുത്തൻകുളം സ്വദേശിയായ മേഘ നിലവിൽ ഇന്ത്യൻ ആർമിയിൽ ഹവിൽദാറായി സേവനമനുഷ്ഠിക്കുന്നു. ആലപ്പുഴയിലെ സായ് സെന്ററിൽനിന്നാണ് പരിശീലനം പൂർത്തിയാക്കിയത്. ദേശീയ ചാമ്പ്യൻഷിപ്പിൽ അഞ്ച് സ്വർണവും ഒരു വെങ്കലവും നേടി. ​ ഒളിമ്പിക്‌സ്‌ മെഡൽ കുട്ടനാട്ടിലെത്തിക്കുക എന്ന ലക്ഷ്യത്തോടെ കഠിനമായ പരിശീലനത്തിലാണ് മേഘ. അച്ഛൻ എൻ പ്രദീപും അമ്മ ശ്രീകലയും സഹോദരി വർഷയും നൽകുന്ന പൂർണപിന്തുണയാണ് തന്റെ വിജയങ്ങൾക്ക് പിന്നിലെന്നും ​റിപ്പബ്ലിക് ദിന പരേഡിലെ പങ്കാളിത്തം വരാനിരിക്കുന്ന ഒളിമ്പിക്സ് മത്സരങ്ങൾക്കുള്ള വലിയൊരു പ്രചോദനമാവുമെന്നും മേഘ പറയുന്നു.