വികസന മുന്നേറ്റത്തില്‍ പട്ടണക്കാട്‌

അരൂർ

വികസന മുന്നേറ്റത്തിന്റെ നേർസാക്ഷ്യമാണ്‌ പട്ടണക്കാട്‌ ബ്ലോക്ക്‌ പഞ്ചായത്ത്‌. തുറവൂർ താലൂക്ക് ആശുപത്രിയുടെ മാറ്റം ഏത് ആതുരാലയത്തിനും മാതൃകയാണ്. പരിമിതികൾ മാത്രമായിരുന്ന ആതുരാലയം ഇന്ന് സൂപ്പർ സ്പെഷ്യാലിറ്റി ആശുപത്രിയോട്‌ കിടപിടിക്കുന്നതാണ്‌. കിഫ്‌ബിക്കരുത്തിലാണ്‌ ആതുരാലയം വികസിച്ചത്‌. അത്യാഹിത വിഭാഗം, ഡയാലിസിസ് യൂണിറ്റ്, സ്ത്രീകളുടെ വാർഡ്, ഒപി തുടങ്ങി മികച്ച സൗകര്യങ്ങൾ ഇവിടെയുണ്ട്. ബഹുനിലകെട്ടിട നിർമാണത്തിന് കിഫ്ബി 51. 40 കോടി അനുവദിച്ചു. 60.2 സെന്റ്‌ സ്ഥലം സർക്കാർ വാങ്ങി നൽകി. 60,000 ചതുരശ്ര അടിയിൽ ആറുനിലകളിലായുള്ള കെട്ടിട നിർമാണം 90 ശതമാനം പൂർത്തീകരിച്ചു. താഴത്തെ നിലയിലാണ് ട്രോമാകെയർ യൂണിറ്റ്. ഒന്നാംനിലയിൽ അന്താരാഷ്‌ട്ര നിലവാരത്തിൽ നാലു തിയറ്ററുകളുള്ള ഓപ്പറേഷൻ സമുച്ചയം. രണ്ടുമുതൽ ആറുവരെ വാർഡുകളിലായി 150 കിടക്കകൾ, മൂന്നു ലിഫ്റ്റുകൾ തുടങ്ങിയവയുണ്ടാകും. ഒന്നാം നിലയിലേക്ക് സ്കൈവാക്ക് . സംസ്ഥാനത്ത് ആദ്യമായി ഡയാലിസിസ് യൂണിറ്റ് സ്ഥാപിച്ച താലൂക്കാശുപത്രി കൂടിയാണ് തുറവൂരിലേത്. 16 യന്ത്രങ്ങൾ അധികമായി സ്ഥാപിച്ചതോടെ ദിവസവും 60 പേർക്ക് ഡയാലിസിസ് ചെയ്യാനാകും. പ്രസവ, പ്രസവാനന്തര ശുശ്രൂഷയ്ക്ക് അത്യാധുനിക സംവിധാനങ്ങളുണ്ട് . അഞ്ചുവർഷത്തെ പദ്ധതി കാലയളവിലെ ഫണ്ടുകളിൽനിന്ന് മിച്ചം പിടിച്ചാണ് ബ്ലോക്ക് പഞ്ചായത്തിന് ആസ്ഥാനം മന്ദിരം നിർമിച്ചത്. പ്രളയത്തിന്റെ പശ്ചാത്തലത്തിൽ, വെള്ളക്കെട്ട്‌ ഒഴിവാക്കുന്നതിനും ജലാശയങ്ങൾ സംരക്ഷിക്കുന്നതിനുമുള്ള പദ്ധതികൾ നടപ്പാക്കാൻ ശ്രദ്ധിച്ചു. അറുപതോളം തോടുകൾ കല്ലുകെട്ടി. കാനകളും നിർമിച്ചു. പ്ലാസ്റ്റിക് മാലിന്യങ്ങൾ സുരക്ഷിതമായി സംസ്‌കരിക്കാൻ പുതിയ കെട്ടിടം നിർമിച്ചു. ജില്ലയിൽ ഏറ്റവും നല്ല ശുചിത്വ സ്ഥാപനത്തിന് പട്ടണക്കാട് ബ്ലോക്കിന് അവാർഡ് ലഭിച്ചു.