വിളക്കുമരം കടന്ന്‌ പള്ളിപ്പുറം

ചേർത്തല

ചേന്നംപള്ളിപ്പുറം പഞ്ചായത്തിലെ 10 വാർഡും തൈക്കാട്ടുശേരി ഒന്പത്‌, പാണാവള്ളി 10, അരൂക്കുറ്റി ഒന്പത്‌ വാർഡുകളും ഉൾക്കൊള്ളുന്നതാണ്‌ ജില്ലാ പഞ്ചായത്ത്‌ പള്ളിപ്പുറം ഡിവിഷൻ. ഡിവൈഎഫ്‌ഐ ചേർത്തല ബ്ലോക്ക്‌ സെക്രട്ടറിയും മുൻ എസ്‌എഫ്‌ഐ നേതാവും പള്ളിപ്പുറം സ്വദേശിനിയുമായ കെ ജെ ജിസ്‌മിയാണ്‌ എൽഡിഎഫ്‌ സ്ഥാനാർഥി. ബാലസംഘത്തിലൂടെ പൊതുപ്രവർത്തനം തുടങ്ങിയ ജിസ്‌മി ഡിവിഷന്‌ സുപരിചിതയാണ്‌. യവജനക്ഷേമ ബോർഡിന്റെ ‘അവളിടം’ പദ്ധതി ജില്ലാ കോ–ഓർഡിനേറ്ററാണ്‌. കേരള സർവകലാശാല യൂണിയൻ എക്‌സിക്യൂട്ടിവ്‌ അംഗമായിരുന്നു. ഡിവൈഎഫ്‌ഐ ജില്ലാ കമ്മിറ്റിയംഗമാണ്‌. വിദ്യാർഥി–യുവജന രംഗങ്ങളിലെ വർഷങ്ങൾനീണ്ട പ്രവർത്തനാനുഭവവുമായാണ്‌ കന്നിയങ്കത്തിന്‌ ഇറങ്ങുന്നത്‌. സർക്കാരും എംഎൽഎയും ത്രിതല പഞ്ചായത്ത്‌ സമിതികളും ഡിവിഷനിൽ നടപ്പാക്കിയ സമാനതകളില്ലാത്ത വികസന–ക്ഷേമ പ്രവർത്തനങ്ങൾ ഉയർത്തിക്കാട്ടിയാണ്‌ ജിസ്‌മിയുടെ പ്രചാരണം. നെടുന്പ്രക്കാട്‌–വിളക്കുമരം പാലം യാഥാർഥ്യമാക്കിയത്‌ സുപ്രധാന നേട്ടമാണ്‌. തടസങ്ങൾ മറികടന്ന്‌ 20 കോടിയിലേറെ ചെലവഴിച്ചാണ്‌ അത്യാകർഷകവും സ‍ൗകര്യപ്രദവുമായ പാലം നിർമിച്ചത്‌. ചേർത്തല നഗരത്തിലേക്ക്‌ രണ്ടാമത്തെ പ്രവേശന കവാടമായ പാലം നാടിന്‌ വികസനക്കുതിപ്പേകും. വിനോദസഞ്ചാര വികസനത്തിന്‌ കരുത്താകുന്ന പാലത്തിന്റെ ഇരുഭാഗത്തെയും റോഡുകൾ വീതികൂട്ടി പുനർനിർമിക്കുന്നത്‌ ഉൾപ്പെടെ പദ്ധതികൾ അനുവദിക്കുമെന്ന്‌ മന്ത്രി പി എ മുഹമ്മദ്‌ റിയാസ്‌ ഉദ്‌ഘാടനവേദിയിൽ പ്രഖ്യാപിച്ചിരുന്നു. കോടികളുടെ കെട്ടിടനിർമാണം ഉൾപ്പെടെ സർക്കാർ സ്‌കൂളുകൾക്ക്‌ വൻ മുന്നേറ്റം. ആരോഗ്യകേന്ദ്രങ്ങളും പുരോഗതി കൈവരിച്ചു. പൂച്ചാക്കൽ–ചിറയ്‌ക്കൽ റോഡ്‌ 2.5 കോടി ചെലവിൽ പുനർനിർമിച്ചത്‌ ഉൾപ്പെടെ റോഡുവികസനവും സാധ്യമായി. തോടുകളുടെ ആഴംകൂട്ടിയും വശങ്ങൾ സംരക്ഷിച്ചും വെള്ളക്കെട്ട്‌ ഒഴിവാക്കാൻ പദ്ധതിയുമെത്തി. കർമ ശേഷിയുടെ കരുത്തിൽ ജിസ്‌മി പൊതുസ്വീകാര്യത നേടിക്കഴിഞ്ഞു. കോൺഗ്രസിലെ ഷീല രഘുവരനാണ്‌ യുഡിഎഫ്‌ സ്ഥാനാർഥി. ബിജെപിയിലെ പ്രീതി ഷാജിയാണ്‌ എൻഡിഎ സ്ഥാനാർഥി.