ബിജെപി വിട്ട് സിപിഐ എമ്മിനൊപ്പം

കായംകുളം

പത്തിയൂർ പഞ്ചായത്ത് 17–ാം വാർഡ് ബിജെപി മുൻ ബൂത്ത് സെക്രട്ടറിയും വാർഡ് പ്രസിഡന്റുമായിരുന്ന അനീഷ്ഭവനത്തിൽ അനീഷ്‌കുമാർ ബിജെപി വിട്ടു. സിപിഐ എമ്മിനൊപ്പം പ്രവർത്തിക്കും. സംസ്ഥാന കൺട്രോൾ കമീഷൻ ചെയർമാൻ കെ എച്ച് ബാബുജാൻ അനീഷിനെ പാർടി പതാക നൽകി സ്വീകരിച്ചു. ഏരിയ സെക്രട്ടറി ബി അബിൻഷാ, ഏരിയ കമ്മിറ്റി അംഗങ്ങളായ എസ് ഗോപിനാഥൻപിള്ള, കരീലക്കുളങ്ങര ലോക്കൽ സെക്രട്ടറി കെ ബി പ്രശാന്ത് എന്നിവർ പങ്കെടുത്തു. ചെങ്ങന്നൂർ മുളക്കുഴ പഞ്ചായത്തിൽ കൂടുതൽ പ്രവർത്തകർ ബിജെപി, ആർഎസ്എസ് ബന്ധം ഉപേക്ഷിച്ച്‌ സിപിഐ എമ്മിനൊപ്പം. കഴിഞ്ഞ തെരഞ്ഞെടുപ്പിൽ മുളക്കുഴ പഞ്ചായത്ത്‌11–ാം വാർഡിൽ ബിജെപി സ്ഥാനാർഥിയായിരുന്ന മനോജ്‌, ആർഎസ്എസ് പ്രവർത്തകരായിരുന്ന അരുൺ, പ്രദീപ് എന്നിവരാണ് സിപിഐ എമ്മിനൊപ്പം സഹകരിച്ച്‌ പ്രവർത്തിക്കാൻ തീരുമാനിച്ചത്. ഇവരെ മുളക്കുഴ സൗത്ത് ലോക്കൽ സെക്രട്ടറി കെ എസ് ഗോപിനാഥൻ സ്വീകരിച്ചു. യോഗത്തിൽ ലോക്കൽ കമ്മിറ്റി അംഗം എം ജെ സുനിൽ അധ്യക്ഷനായി. ലോക്കൽ കമ്മിറ്റി അംഗം നിതിൻ ചെറിയാൻ, ബ്രാഞ്ച് സെക്രട്ടറിമാരായ രതീഷ് പി തങ്കച്ചൻ, രാജശ്രീ എന്നിവർ സംസാരിച്ചു.