ഇടതോരം ചേരാൻ 
തണ്ണീർമുക്കം 


തണ്ണീർമുക്കം

തണ്ണീർമുക്കം പഞ്ചായത്തിലെ 24 വാർഡും കഞ്ഞിക്കുഴിയിലെ 11 വാർഡും ചേർന്ന്‌ 35 വാർഡുകൾ അടങ്ങുന്നതാണ് ജില്ലാ പഞ്ചായത്തിൽ പുതിയതായി രൂപീകരിച്ച തണ്ണീർമുക്കം ഡിവിഷൻ. ആകെ 59,267 വോട്ടർമാർ. മുൻ കാലങ്ങളിൽ പള്ളിപ്പുറം, കഞ്ഞിക്കുഴി ഡിവിഷനുകളുടെ ഭാഗമായിരിന്നു രണ്ട്‌ പഞ്ചായത്തും. രൂപീകരണംമുതൽ ഇടതുചേർന്ന് നിൽക്കുന്ന ഡിവിഷനുകളാണ്‌. മഹിളാ അസോസിയേഷൻ പ്രവർത്തകയും വ്യാപാരി വ്യവസായി സമിതി നേതാവും സിപിഐ എം തണ്ണീർമുക്കം ലോക്കൽ കമ്മിറ്റി അംഗവുമായ വിജയശ്രീ സുനിലാണ് എൽഡിഎഫിനായി മത്സരിക്കുന്നത്. സംസ്ഥാന സർക്കാരും എംഎൽഎയും ത്രിതല പഞ്ചായത്ത്‌ ഭരണസമിതികളും ഡിവിഷൻ പ്രദേശത്ത് നടത്തിയ സാമാനതകളില്ലാത്ത വികസനക്ഷേമ പ്രവർത്തനങ്ങളാണ്‌ എൽഡിഎഫ് പ്രചാരണത്തിൽ ഉയർത്തിക്കാട്ടുന്നത്. തണ്ണീർമുക്കം ഫെസ്‌റ്റിലൂടെ പ്രദേശത്തെ വിനോദസഞ്ചാര മേഖലയുടെ അനന്തസാധ്യതകളെ ഉയർത്തി. പഞ്ചായത്ത് ടെർമിനൽ തുറന്നു. തണ്ണീർമുക്കം പഞ്ചായത്ത്‌ ഓഫീസ് പുനരുദ്ധാരണം, വനിതാ ഫിറ്റ്നസ് സെന്റർ, ഓപ്പൺ സ്‌റ്റേജ്, കൂടാതെ മത്സ്യമേഖലയിലും ആരോഗ്യ – വിദ്യാഭ്യാസ – സാമൂഹിക രംഗത്തും നിരവധി പദ്ധതികളാണ് ജില്ലാ പഞ്ചായത്ത്‌ നടപ്പാക്കിയത്. പുതിയ സ്‌മാർട്ട് അങ്കണവാടി, റോഡ്, കാന നിർമാണങ്ങൾ, ക്ഷേത്രക്കുളങ്ങൾ കല്ല് കെട്ടി സംരക്ഷണം തുടങ്ങി നിരവധി പദ്ധതികളും പൂ‍ർത്തിയാക്കി. യുഡിഎഫിനായി സി എ ജയശ്രീയും എൻഡിഎയ്‌ക്കായി അഡ്വ. എൻ എസ് സന്ധ്യയുമാണ്‌ മത്സരരംഗത്ത്‌.