നേട്ടം തുടരാൻ പള്ളിപ്പാട്

ഹരിപ്പാട്

പള്ളിപ്പാട്, വീയപുരം, ചെറുതന പഞ്ചായത്തുകളും ചേപ്പാടിന്റെ ഒന്നുമുതൽ നാലുവരെയും 13 മുതൽ 16 വരെ വാർഡുകളും കരുവാറ്റയിലെ 6, 11 വാർഡുകളുമടക്കം 52 വാർഡുകളാണ്‌ ജില്ലാ പഞ്ചായത്തിലെ പള്ളിപ്പാട്‌ ഡിവിഷനിൽ. അമ്പതിനായിരത്തോളം വോട്ടർമാർ. യുഡിഎഫ് മേൽക്കെയുണ്ടായിരുന്ന ഡിവിഷൻ കഴിഞ്ഞ തെരഞ്ഞെടുപ്പിൽ എഐവൈഎഫ് നേതാവ് എ ശോഭ പിടിച്ചെടുത്തു. സിപിഐ ജില്ലാ എക്‌സിക്യൂട്ടീവ് അംഗവും കർഷകനുമായ വീയപുരം പ്രയാറ്റേരിൽ കെ കാർത്തികേയനാണ് എൽഡിഎഫ് സ്ഥാനാർഥി. വീയപുരം സീഡ് ഫാം ജീവനക്കാരനായി സർവീസ് സംഘടനാ രംഗത്ത് സജീവമായാണ്‌ കാർത്തികേയൻ പൊതുരംഗത്തെത്തിയത്. ആലപ്പുഴ മണ്ണ് പരിശോധന കേന്ദ്രത്തിൽനിന്ന്‌ വിരമിച്ച ശേഷം മുഴുവൻ സമയ പ്രവർത്തകനായി. സിപിഐ വീയപുരം ലോക്കൽ സെക്രട്ടറി, ഹരിപ്പാട് മണ്ഡലം സെക്രട്ടറി, പായിപ്പാട് ജലോത്സവസമിതി സെക്രട്ടറി, വൈസ്ചെയർമാൻ, പായിപ്പാട് ചുണ്ടൻവള്ള സമിതി സെക്രട്ടറി എന്നീനിലകളിലും പ്രവർത്തിച്ചു. ​ ചെറുതന കുടിവെള്ള പദ്ധതി, മുടിക്കുഴി റോഡ്, കാഞ്ഞിരംതുരുത്ത് ഉന്നതി റോഡ്, പള്ളിമുക്ക് -കടവ് റോഡ്, ചക്കൂരേത്ത് കുറ്റിയിൽ മുക്ക് - ലീഡിങ്‌ ചാനൽ റോഡ്, ആവക്കാട് ജങ്‌ഷൻ–കൊടുവത്തുംകുളം റോഡ് തുടങ്ങി ഒട്ടേറെ പദ്ധതികളാണ്‌ കഴിഞ്ഞ അഞ്ചുവർഷം ഡിവിഷനിൽ നടപ്പാക്കിയത്‌. കോതേരി, ഇലവുന്താനം പാടശേഖരങ്ങളിൽ അടിസ്ഥാനസൗകര്യവികസനം, ആയാപറമ്പ്, വീയപുരം ഹയർസെക്കൻഡറി സ്‌കൂളുകളുടെ നവീകരണം, സ്‌കിൽ ഡെവലപ്‌മെന്റ്‌ സെന്റർ, പെൺകുട്ടികൾക്ക് ജിം, എസ്‌പിസി പദ്ധതിക്ക്‌ ധനസഹായം, പഠനമുറികൾ, സാംസ്‌കാരികനിലയം, ധീരനാവികൻ വിഷ്‌ണുവിന്‌ സ്‌മാരകം, ആധുനിക അങ്കണവാടികൾ, പകൽവീട്, കുടിവെള്ളപദ്ധതികളും യാഥാർഥ്യമാക്കിയാണ്‌ എൽഡിഎഫ്‌ വോട്ടുതേടുന്നത്‌. കെപിസിസി അംഗം ജോൺ തോമസ് യുഡിഎഫിനായും പ്രണവം ശ്രീകുമാർ എൻഡിഎയ്‌ക്കായും മത്സരിക്കും.