തമ്മിലടി, കൊള്ള, കെടുകാര്യസ്ഥത

ഹരിപ്പാട്

യുഡിഎഫിന്റെ 10 വർഷത്തെ ഹരിപ്പാട് നഗരസഭാ ഭരണം ബാക്കിവച്ചത്‌ വികസന മുരടിപ്പും അഴിമതിയും സ്വജനപക്ഷപാതവും മാത്രം. കോടികളുടെ സർക്കാർ ഫണ്ടാണ്‌ കെടുകാര്യസ്ഥതമൂലം നഷ്‌ടമാക്കിയത്‌. പട്ടണഹൃദയത്തിൽ മാസങ്ങളായി അടഞ്ഞുകിടക്കുന്ന തുമ്പൂർമുഴി പ്ലാന്റുകൾ മാലിന്യസംസ്‌കരണ പദ്ധതികളിൽനിന്ന് നഗരസഭ പിന്മാറിയതിന്റെ നേർസാക്ഷ്യമാണ്‌. ​ ഹരിതകർമസേന ശേഖരിക്കുന്ന പ്ലാസ്‌റ്റിക്‌ മാലിന്യസൂക്ഷിപ്പിന്റെ ഇടത്താവളം മാത്രമായി തുമ്പൂർമുഴി യൂണിറ്റുകൾ. വികസന പദ്ധതികൾക്കായി സർക്കാർ നൽകിയ 22 കോടിയിലധികം രൂപയാണ് നഗരസഭ പാഴാക്കിയത്‌. നോൺ റോഡ് ഫണ്ടായി ലഭിച്ച 10.54 കോടിയിൽ 6.42 കോടിയും പാഴാക്കി. ഡാണാപ്പടി, പിള്ളത്തോടടക്കം ശുചീകരിച്ചില്ല. കേന്ദ്രീകൃത ഡ്രെയിനേജ്, സ്വീവേജ് സംവിധാനങ്ങളുമില്ല. അമൃതം പദ്ധതിയിൽ സ്ഥാപിച്ച ടാപ്പുകളിൽ കുടിവെള്ളം കിട്ടാക്കനിയാണ്‌. കാർഷിക പദ്ധതികളൊന്നും കൃഷിക്കാരിലെത്തിക്കാനായില്ല. ​അഞ്ച്‌ സെന്റ്‌ സ്ഥലം വാങ്ങി ആയുർവേദ ഡിസ്‌പെൻസറിക്ക്‌ കെട്ടിടമുണ്ടാക്കാൻ പോലും നഗരസഭക്ക് കഴിഞ്ഞില്ല. ഭൂ–-ഭവന രഹിതരായി കണ്ടത്തിയ 72 കുടുംബത്തിൽ ഒരാൾക്കുപോലും ഭൂമിയോ വീടോ നൽകാനായില്ല. അയ്യൻകാളി തൊഴിലുറപ്പ് പദ്ധതിയിൽ അനുവദിച്ച ലക്ഷക്കണക്കിന് രൂപ പാഴാക്കി. കുടുംബശ്രീക്ക്‌ ആസ്ഥാനനിർമാണം കല്ലിടലിൽ മാത്രം ഒതുങ്ങി. ഗതാഗതക്കുരുക്ക് നിയന്ത്രിക്കുന്നതിലും ഹൈക്കോടതി നിർദേശിച്ച പാർക്കിങ് സൗകര്യമൊരുക്കുന്നതിലും അമ്പേ പരാജയമായി. പൊതുശ്‌മശാനത്തിന് കിഫ്ബിവഴി സർക്കാർ നൽകിയ 50 ലക്ഷംരൂപ രണ്ട്‌ വർഷമായിട്ടും ചെലവഴിച്ചില്ല. പൊതുശൗചാലയങ്ങൾ, വിനോദ – വിശ്രമകേന്ദ്രങ്ങൾ, ടൗൺഹാൾ എന്നിവയടക്കം അടിസ്ഥാനസൗകര്യങ്ങളൊന്നും ഏർപ്പെടുത്താനായിട്ടില്ല.