ഇ–മാലിന്യം ഇല്ലാതാക്കാം 
പണവും നേടാം

ആലപ്പുഴ
കോർപറേഷനുകളിലെയും നഗരസഭകളിലെയും ഇ-ലക്‌ട്രിക്‌ മാലിന്യ ശേഖരണത്തിന്‌ പഞ്ചായത്തുകളിൽനിന്ന്‌ മാലിന്യംശേഖരിക്കാൻ ആരംഭിച്ച്‌ ഹരിതകർമസേന. 16 പഞ്ചായത്തിൽനിന്നായി 2901 കിലോ ഇ–മാലിന്യമാണ്‌ ഇതുവരെ ശേഖരിച്ചത്‌. ടെലിവിഷൻ, കംപ്യൂട്ടർ, മൊബൈൽഫോൺ, റെഫ്രിജറേറ്റർ, വാഷിങ് മെഷീൻ, റേഡിയോ, പ്രിന്റർ, മൈക്രോവേവ് ഓവൻ, ലാപ്ടോപ്, ബാറ്ററികൾ, മോട്ടോർ, യുപിഎസ് തുടങ്ങി 44 ഇനം ഇലക്‌ട്രോണിക്‌സ്, ഇലക്‌ട്രിക്കൽ ഉപകരണങ്ങളാണ് കിലോയ്‌ക്ക്‌ നിശ്ചിത തുകനൽകി ഹരിത കർമസേന ശേഖരിക്കുന്നത്. റെഫ്രിജിറേറ്റർ – 20 രൂപ, ലാപ്‌ടോപ്പ് – 100, എൽസിഡി, എഇഡി ടിവി – 16, ടോപ് ലോഡ് വാഷിങ്‌ മെഷീൻ – 20, സീലിങ്‌ ഫാൻ – 42, മൊബൈൽഫോൺ – 115, സ്വിച്ച് ബോർഡ് – 17, എയർ കണ്ടീഷണർ – 58, എൽഇഡി ടിവി – 18, ഇന്റക്ഷൻ കുക്കർ – 10രൂപ ഒരു കിലോയ്‌ക്ക്‌ ലഭിക്കുന്ന വില. ഹരിത കർമസേന പഞ്ചായത്തുകളിൽനിന്ന്‌ ശേഖരിക്കുന്ന ഇ–മാലിന്യങ്ങൾ ക്ലീൻ കേരള കമ്പനി ഏറ്റെടുത്ത് ശാസ്‌ത്രീയ സംസ്‌കരണത്തിന് അയയ്‌ക്കും. പുനരുപയോഗമായവയ്‌ക്ക്‌ നിശ്ചിതതുക ഹരിത കർമസേനയ്‌ക്ക് നൽകും. 
 പഞ്ചായത്തുകളിൽനിന്ന്‌ ശേഖരിക്കുന്ന ഇ–മാലിന്യങ്ങൾക്ക്‌ നൽകുന്ന നിരക്കിൽ നഗരസഭകളിലേതിനേക്കാൾ വ്യത്യാസമുണ്ട്. ആപത്കരമായ ഇ-–മാലിന്യങ്ങളുടെ പട്ടികയിൽപ്പെടുന്ന പിക്‌ചർ ട്യൂബ്‌, എൽഇഡി ബൾബുകൾ, ട്യൂബ് ലൈറ്റുകൾ, സിഎഫ്എൽ തുടങ്ങിയവ സംസ്‌കരി​ക്കുന്നതി​ന് തദ്ദേശ സ്ഥാപനങ്ങൾ ക്ലീൻ കേരള കമ്പനി​ക്ക് പണം നൽകണം. 
 കഴിഞ്ഞ ജൂലൈ 15നാണ് സംസ്ഥാനതലത്തിൽ കോർപറേഷനുകളിലും നഗരസഭകളിലും ഇ–മാലിന്യശേഖരണം ഹരിതകർമസേന ആരംഭിച്ചത്. ഇ‍ൗ കാമ്പയിന്‌ വലിയ പിന്തുണ ലഭിച്ചതോടെയാണ്‌ പഞ്ചായത്തുകളിൽനിന്ന്‌ ഇ‍–മാലിന്യശേഖരണംതുടങ്ങിയത്‌.