മരിച്ചത്‌ ജെയ്‌നമ്മയോ, മൃതദേഹാവശിഷ്ടങ്ങൾ 
ഡിഎൻഎ പരിശോധനയ‍്ക്ക്

ചേർത്തല

കഴിഞ്ഞ ദിവസം ചേർത്തല പള്ളിപ്പുറത്തെ വീട്ടുവളപ്പിൽനിന്ന്‌ കണ്ടെത്തിയ മൃതദേഹാവശിഷ്‌ടങ്ങൾ ഡിഎൻഎ പരിശോധനയ്ക്ക്‌ അയക്കാൻ കോട്ടയം ക്രൈംബ്രാഞ്ച്‌. ഏറ്റുമാനൂരിൽനിന്ന്‌ കാണാതായ അതിരമ്പുഴ കാക്കാനാട്ടുകാലായിൽ ജെയ്‌നമ്മയുടെ മൃതദേഹമാണോയെന്ന്‌ ഉറപ്പിക്കാനായാണ്‌ ശാസ്‌ത്രീയ പരിശോധന. ക്രൈംബ്രാഞ്ച്‌ കസ്റ്റഡിയിലുള്ള പള്ളിപ്പുറം പൊങ്ങുംതറ സെബാസ്റ്റ്യന്റെ വീട്ടുവളപ്പിൽനിന്ന്‌ തിങ്കളാഴ്ചയാണ്‌ മൃതദേഹാവശിഷ്ടങ്ങൾ ലഭിച്ചത്‌. സെബാസ്റ്റ്യന്റെ അറസ്റ്റ് രേഖപ്പെടുത്തി. മണിക്കൂറുകൾ നീണ്ട ചോദ്യംചെയ്യലിനൊടുവിലാണ്‌ കോട്ടയം ക്രൈംബ്രാഞ്ച്‌ പ്രതിയുടെ അറസ്റ്റ്‌ രേഖപ്പെടുത്തിയത്‌. ചോദ്യംചെയ്യലിനോട്‌ പ്രതി സഹകരിക്കുന്നില്ലെന്ന്‌ അന്വേഷണ ഉദ്യോഗസ്ഥർ പറഞ്ഞു. കൊലപാതകം, തെളിവ് നശിപ്പിക്കൽ ഉൾപ്പെടെയുള്ള വകുപ്പുകൾ ചുമത്തിയാണ്‌ കേസ്. കോട്ടയം മെഡിക്കൽ കോളേജിലെ പോസ്റ്റ്‌മോർട്ടം നടപടികൾക്ക്‌ ശേഷമായിരിക്കും പൂനെ രാജീവ്‌ഗാന്ധി ഇൻസ്റ്റിറ്റ്യൂട്ടിലേക്ക്‌ ഡിഎൻഎ പരിശോധനയ്ക്ക്‌ അയക്കുക. ഇതിനായി ജെയ്‌നമ്മയുടെ സഹോദരങ്ങളായ സാവിയോ, സഹോദരി ആൻസി എന്നിവരിൽ നിന്നാണ് സാമ്പിളുകൾ ശേഖരിച്ചു. ഫലം വന്നശേഷം തുടർനടപടികളിലേക്ക്‌ കടക്കുമെന്നും മൂന്ന്‌ ദിവസംകൊണ്ട്‌ പരിശോധനാ ഫലം ലഭിക്കുമെന്നാണ്‌ പ്രതീക്ഷയെന്നും അന്വേഷണ ഉദ്യോഗസ്ഥനായ ഡിവൈഎസ്‌പി സാജൻ സേവ്യർ പറഞ്ഞു. പൊലീസ്‌ സർജന്റെ നേതൃത്വത്തിൽനടന്ന പോസ്റ്റ്‌മോർട്ടം റിപ്പോർട്ട്‌ അടുത്ത ദിവസം ലഭിക്കും. 2024 ഡിസംബർ 23നാണ്‌ ജെയ്‌നമ്മയെ കാണാതായത്‌. പാലായിൽ ധ്യാനത്തിന്‌ പോകുകയാണെന്ന്‌ പറഞ്ഞാണ്‌ ഇവർ വീട്ടിൽ നിന്നിറങ്ങിയത്‌. എന്നാൽ നാല്‌ ദിവസം കഴിഞ്ഞിട്ടും തിരിച്ചെത്താതിരുന്നതോടെ വീട്ടുകാർ പൊലീസിൽ പരാതി നൽകുകയായിരുന്നു. ഈ കഴിഞ്ഞ ഏപ്രിലിലാണ്‌ കേസ്‌ ക്രൈംബ്രാഞ്ച്‌ ഏറ്റെടുക്കുന്നത്‌. കാണാതായ ദിവസങ്ങളിൽ ജെയ്‌നമ്മയുടെ മൊബൈൽ ഫോൺ ടവർ ലൊക്കേഷൻ പള്ളിപ്പുറത്താണെന്ന്‌ അന്വേഷണ സംഘം കണ്ടെത്തിയിരുന്നു. ഇതിനെ തുടർന്നാണ്‌ സമാന കേസിൽ പ്രതിസ്ഥാനത്തുള്ള സെബാസ്റ്റ്യനിലേക്ക്‌ അന്വേഷണസംഘം എത്തുന്നത്‌. മരണത്തിൽ ദുരൂഹതയുണ്ടെന്നും സമഗ്രമായ അന്വേഷണം വേണമെന്നും സാവിയോയും ആൻസിയും പറഞ്ഞു. മെഡിക്കൽ കോളേജിൽ ഡിഎൻഎ സാമ്പിളുകൾ നൽകിയശേഷം മാധ്യമങ്ങളോട്‌ പ്രതികരിക്കുകയായിരുന്നു ഇരുവരും.