എഴുത്തിൽ തെളിഞ്ഞത്‌ 
വിശപ്പിനെതിരായ പോരാട്ടം

അരൂർ

കവിയും ഗാനരചയിതാവുമായ ചന്തിരൂർ ദിവാകരന്റെ എഴുത്തിൽ ഏറെയും തെളിഞ്ഞത്‌ വിശപ്പിനെതിരായ പോരാട്ടം. കൊടിയ ദാരിദ്ര്യത്തിന്റെ തീവ്രത അനുഭവിച്ച ആ മനസിന് വിശപ്പിന്റെ പോരാട്ടങ്ങളിൽനിന്ന് വഴിമാറി നടക്കാനാകില്ലായിരുന്നു. കർഷകത്തൊഴിലാളിയുടെ കണ്ണീരിന്റെ കഥകളാണ് അദ്ദേഹത്തിലെ കവിക്ക് ജന്മംനൽകിയത്. തൊഴിലാളിയുടെ ആത്മാഭിമാനം സമരഗീതങ്ങളാക്കിയ ചന്തിരൂർ ദിവാകരന്റെ കവിഹൃദയം വിടപറഞ്ഞതോടെ നഷ്‌ടമാകുന്നത്‌ മരണംവരെയും പുരോഗമനാശയത്തെ ഹൃദയത്തോട് ചേർത്ത് ജീവിച്ചയാളെയാണ്‌. മത്സ്യത്തൊഴിലാളിയായ ചന്തിരൂർ വള്ളവനാട്ട് കളത്തിൽ മാക്കിയുടെയും കുറുമ്പയുടെയും മൂന്ന്‌ മക്കളിൽ രണ്ടാമനായി 1946 മെയ് 10നാണ്‌ ജനനം. കുണ്ടേലാട്ട് മല്ലന്മാരുടെ കുടിയിടഭൂമിയിൽ പട്ടിണി അറിഞ്ഞാണ് ദിവാകരനും സഹോദരങ്ങളും വളർന്നത്. ചന്തിരൂർ സർക്കാർ സ്‌കൂളിൽ നല്ല മാർക്കിൽ ഏഴാംക്ലാസ് പാസായെങ്കിലും ദാരിദ്ര്യം മൂലം ഹൈസ്‌കൂൾ പഠനം സാധ്യമായില്ല. പഠനം മുടങ്ങിയ വേദനയിലും കുടുംബത്തിന്റെ പട്ടിണി മാറ്റാൻ ദിവാകരൻ അച്ഛനോടൊപ്പം മ‍ീൻപിടിക്കാൻ പോയിത്തുടങ്ങി. തൊഴിലിനിടയിൽ തത്തുല്യ പരീക്ഷയിലൂടെ 19–-ാം വയസിൽ പത്താംതരം വിജയിച്ചു.സഹോദരങ്ങളുടെ പഠനത്തിനായി തന്റെ കോളേജ് പഠനം ഉപേക്ഷിച്ച് പള്ളുരുത്തിയിലെ സ്വകാര്യ പ്രസിൽ പ്രൂഫ് റീഡറായി. 31–-ാം വയസിൽ എറണാകുളം മഹാരാജാസ് കോളേജിൽനിന്ന്‌ സംസ്‌കൃതം ഭാഷാവിഷയമായി പ്രീഡിഗ്രി പാസായി. തുടർന്ന് ഹൗസിങ്‌ ബോർഡിൽ ജോലിയിൽ പ്രവേശിച്ചു. ചന്തിരൂർ സ്‌കൂളിലെ പഠനകാലമാണ് സാഹിത്യത്തിലേക്കുള്ള പ്രവേശിക. അധ്യാപകർ അഭിനയിക്കുന്ന നാടകങ്ങൾക്ക് പാട്ടെഴുതി തുടക്കം. അവിചാരിതമായി ആദ്യ നാടകത്തിൽ പെൺവേഷവും കെട്ടി. അധ്യാപകൻ ചെങ്ങന്നൂർ ഭാസി സംവിധാനം ചെയ്‌ത "സീതാലക്ഷ്‌മി'യായിരുന്നു നാടകം. തുടർന്ന് വിവിധ അമേച്വർ–പ്രൊഫഷണൽ നാടകങ്ങൾക്ക് പാട്ടെഴുതി. ചന്തിരൂർ ദിവാകരന്റെ വരികൾക്ക് സംഗീതസംവിധായകൻ എം കെ അർജുനൻ ഈണം നൽകിയ നാടകഗാനങ്ങൾക്ക് ശ്രോതാക്കൾ ഏറെയായിരുന്നു. എം കെ അർജുനന്റെ ശുപാർശയിൽ പള്ളുരുത്തി കോണം ദേശീയ സമിതിയിൽ പ്രവേശിച്ചതാണ് വഴിത്തിരിവായത്. വില്ലുപാട്ടുകളിൽ തുടങ്ങി കേരളമാകെ ശ്രദ്ധനേടിയ നാടകഗാനങ്ങൾ അദ്ദേഹം എഴുതിയത് ഇവിടെ നിന്നാണ്. "സംഗമഗീതം' നാടകത്തിലെ ഗാനങ്ങൾ ആസ്വാദ്യഹൃദയങ്ങളിൽ സ്ഥാനംനേടി. ദിവാകരൻ നാടകത്തിന്‌ എഴുതിയ പാട്ട് പട്ടണക്കാട് പുരുഷോത്തമനും മകളും പാടി ഹിറ്റാക്കി. അദ്ദേഹത്തിന്റെ വരികൾക്ക്‌ പെരുമ്പാവൂർ ജി രവീന്ദ്രനാഥും ഇ‍ൗണം പകർന്നു. മുൻ എംഎൽഎ ജോൺ ഫെർണാണ്ടസ് സംവിധാനംചെയ്‌ത "ഗംഗയാറൊഴുകുന്ന നാട്ടിൽ' നാടകത്തിലെ ദിവാകരന്റെ വരികൾ ഒരു തലമുറയുടെ മനസിൽ ഇന്നുമുണ്ട്. 1971ൽ സ്വതന്ത്രമായി പ്രസിദ്ധീകരിച്ച "ഉദയം കാത്ത്’ ആണ് ആദ്യ കവിതാസമാഹാരം. ഭാഷാശൈലി ഇഷ്‌ടപ്പെട്ട എസ്‌പിസിഎസ് പബ്ലിക്കേഷൻ ഡയറക്ടർ സി പി ശ്രീധരൻ അടുത്ത കവിതാസമാഹാരമായ "മുഴക്കുക പാഞ്ചജന്യം' പ്രസിദ്ധീകരിച്ചു. മൗനനൊമ്പരം, കർണികാരം, പട്ടിണിത്തെയ്യം അടക്കം 10 സമാഹാരങ്ങളിലായി അറുന്നൂറോളം കവിതകളെഴുതി. ജനനായകൻ ഇ കെ നായനാർ, വിപ്ലവകവി കൃഷ്‌ണൻകുട്ടി എന്നിവരെക്കുറിച്ച് എഴുതിയ അരുണോദയമാണ് അവസാന കവിത. തൊഴിലാളിവർഗത്തോടുള്ള അചഞ്ചലമായ കൂറ് പ്രഖ്യാപിക്കുന്ന പട്ടിണിത്തെയ്യമാണ് അദ്ദേഹത്തിന് ഏറെ പ്രിയപ്പെട്ടത്. പണ്ഡിറ്റ് കറുപ്പൻ പുരസ്‌കാരം, സുരേന്ദ്രൻ സ്‌മാരക അവാർഡ്‌, ബോധി അവാർഡ്, ഖസാക്ക്‌ പുരസ്‌കാരം, മലയാള സാഹിത്യമണ്ഡലം അവാർഡ്, കൃഷ്‌ണ അവാർഡ്, ദളിത് സാഹിത്യ അക്കാദമി അവാർഡ്, അംബേദ്കർ പുരസ്‌കാരം, സർഗശ്രീ പുരസ്‌കാരം, കവിസമാജം പുരസ്‌കാരം എന്നിവ അദ്ദേഹത്തിന്‌ ലഭിച്ചു.