മിന്നിത്തിളങ്ങാൻ അമ്പലപ്പുഴ

അമ്പലപ്പുഴ

അമ്പലപ്പുഴ വടക്ക് പഞ്ചായത്തിലെ 15, തെക്ക് പഞ്ചായത്തിലെ 17, പുറക്കാട് പഞ്ചായത്തിലെ 19 ഉൾപ്പെടെ ആകെ 54 വാർഡുകളാണ്‌ ജില്ലാ പഞ്ചായത്ത് അമ്പലപ്പുഴ ഡിവിഷനിൽ. 75,688 വോട്ടർമാർ. മത്സ്യ, കാർഷിക മേഖലകൾ പ്രധാനമായ ഡിവിഷനിൽ ഇ കെ ജയനാണ് ഇടതുമുന്നണി സ്ഥാനാർഥി. സ്വാതന്ത്ര്യസമര സേനാനിയായിരുന്ന പുന്നപ്ര ഇരുപത്തിഅഞ്ചിൽ കുമാരന്റെ മകനായ ഇ കെ ജയൻ നാലാം തവണയും സിപിഐ മണ്ഡലം സെക്രട്ടറിയായി പ്രവർത്തിക്കുന്നതിനിടെയാണ് മത്സരം. സിപിഐ ജില്ലാ കൗൺസിൽ അംഗമായ ജയൻ എഐവൈഎഫിലൂടെ പൊതുരംഗത്ത് സജീവമായി. എഐടിയുസി ജില്ലാ കൗൺസിൽ അംഗം, ഡിടിപിസി എക്സിക്യൂട്ടീവ് കമ്മിറ്റിയംഗം, അമ്പലപ്പുഴ കയർ സൊസൈറ്റി പ്രസിഡന്റ്‌ തുടങ്ങിയ നിലകളിൽ കർമനിരതനായ ജയൻ, മുത്തങ്ങയിലെ പ്രതിഷേധ സംഗമത്തിലടക്കം അടിസ്ഥാന ജനവിഭാഗങ്ങളുടെ ആവശ്യങ്ങൾക്കായി പോരാടി. 5.5 കോടിയിലധികം രൂപയുടെ വികസനങ്ങളാണ് ഡിവിഷനിൽ നടത്തിയത്. അമ്പലപ്പുഴ തെക്ക് പഞ്ചായത്തിൽ ശുചിത്വ മിഷന്റെ സഹായത്തോടെ 45 ലക്ഷം ചെലവിൽ ഗോവർധന പ്ലാന്റ്‌, 25 ലക്ഷം ചെലവിൽ പൊലീസ് സ്റ്റേഷൻ റോഡ്, 39 ലക്ഷം ചെലവിൽ നാലുചിറ സ്കൂളിന്‌ പുതിയ കെട്ടിടം, ആറ്‌ അങ്കണവാടികൾക്ക് പുതിയ കെട്ടിടങ്ങൾ, പാടശേഖരങ്ങൾക്ക് മോട്ടോർതറകൾ, ഉന്നതികളിലെ ജീർണാവസ്ഥയിലായിരുന്ന നടപ്പാതകളും റോഡുകളും സഞ്ചാരയോഗ്യമാക്കൽ, കുടിവെള്ള പൈപ്പ്‌ ലൈനുകൾ, മത്സ്യത്തൊഴിലാളികൾക്ക് വള്ളവും വലയും തുടങ്ങി ജനക്ഷേമത്തിന്റെയും വികസനത്തിന്റെയും അടയാളങ്ങൾ. മത്സ്യത്തൊഴിലാളി കോൺഗ്രസ് സംസ്ഥാന സെക്രട്ടറി എ ആർ കണ്ണനാണ് യുഡിഎഫിനായി മത്സരരംഗത്തുള്ളത്. ബിജെപി ജില്ലാ ജനറൽ സെക്രട്ടറി അരുൺ അനിരുദ്ധനാണ് എൻഡിഎ സ്ഥാനാർഥി.