കാട്ടാനയുടെ ആരോഗ്യസ്ഥിതി മോശം

കാലടി

കാലടി പ്ലാന്റേഷനിൽ കാലിൽ മുറിവേറ്റ് ചികിത്സ നൽകിയ കൊന്പനാനയുടെ ആരോഗ്യസ്ഥിതിയിൽ പുരോഗതിയില്ലെന്നും നടക്കാൻകഴിയാത്ത അവസ്ഥയാണെന്നും വനംവകുപ്പ്.

സെപ്തംബർ 19ന്‌ ആണ് മയക്കുവെടിവച്ച് പിടിച്ച് കാലിലെ മുറിവിന് ചികിത്സനൽകി ആനയെ വനത്തിൽ വിട്ടത്. എറണാകുളം അസിസ്റ്റന്റ് ഫോറസ്റ്റ്‌ വെറ്ററിനറി ഓഫീസർ ബിനോയ് സി ബാബുവിന്റെ നേതൃത്വത്തിലായിരുന്നു ചികിത്സ.

അതിരപ്പിള്ളി–ഏഴാറ്റുമുഖം ഫോറസ്റ്റ് സ്റ്റേഷൻ ജീവനക്കാർ ആനയെ നിരന്തരം നിരീക്ഷിക്കുകയും മരുന്ന് നൽകുകയും ചെയ്യുന്നുണ്ട്‌. നിലവിൽ മുറിവ്‌ ഉണങ്ങാത്തതടക്കം പ്രതിസന്ധിയാകുന്നുണ്ട്‌. ഡോക്ടർമാരുടെ സംഘം ആനയുടെ ആരോഗ്യസ്ഥിതി വിലയിരുത്തി തുടർചികിത്സ നൽകുന്നതിനുള്ള നടപടി സ്വീകരിച്ചുവരികയാണ്.

ഏഴാറ്റുമുഖം ഫോറസ്റ്റ് സ്റ്റേഷൻ പരിധിയിലെ എരുമത്തടം ഭാഗത്ത് സെപ്തംബർ 15ന്‌ ആണ് വലതുപിൻകാലിന് പരിക്കേറ്റ നിലയിൽ കൊമ്പനെ കണ്ടത്. അതിരപ്പിള്ളി, ഏഴാറ്റുമുഖം സ്റ്റേഷനുകളിലെ ജീവനക്കാർ വാഴച്ചാൽ ഡിഎഫ്ഒയുടെ നിർദേശപ്രകാരം ആനയെ നിരീക്ഷിച്ചു. തുടർന്നാണ്‌ ബിനോയ് സി ബാബുവിന്റെ നേതൃത്വത്തിൽ ആനയെ മയക്കുവെടിവച്ച് പിടികൂടി ചികിത്സ നൽകിയത്‌.