മാറാതെ യുഡിഎഫ്‌ വിമതർ

കൊച്ചി

ഗ്രൂപ്പ്‌ വൈരവും പേമെന്റ്‌ സീറ്റ്‌ വിവാദവും രൂക്ഷമായ യുഡിഎഫിൽ മുന്നണി സ്ഥാനാർഥികൾക്കെതിരെ ജില്ലയിലെന്പാടും വിമതർ രംഗത്ത്‌. യുവാക്കളെയും പുതുമുഖങ്ങളെയും പരിഗണിച്ചില്ലെന്ന പരാതിയെ തുടർന്ന്‌ രാജി ഉൾപ്പെടെ പ്രതിഷേധങ്ങൾ ഉയർന്നിരുന്നു. നേതാക്കളുടെ പെട്ടിയെടുപ്പുകാർക്കും ബന്ധുക്കൾക്കുമായാണ്‌ സീറ്റ്‌ പങ്കിട്ടതെന്ന ആക്ഷേപം യുഡിഎഫ്‌ നേതൃത്വം അവഗണിച്ചതോടെയാണ്‌ കൊച്ചി കോർപറേഷനിലും ത്രിതല പഞ്ചായത്തിലും പൊരുതാനുറച്ച്‌ വിമതർ പത്രിക നൽകിയത്‌.

കൊച്ചി കോർപറേഷൻ പാലാരിവട്ടം ഡിവിഷനിൽ യുഡിഎഫ്‌ തൃക്കാക്കര മണ്ഡലം ചെയർമാൻ ജോസഫ്‌ അലക്‌സ്‌, കോണത്ത്‌ മുൻ ഡെപ്യൂട്ടി മേയർ കെ ആർ പ്രേമകുമാർ, ചുള്ളിക്കലിൽ ക‍ൗൺസിലർ ബാസ്‌റ്റിൻ ബാബു, ഗിരിനഗറിൽ ക‍ൗൺസിലർ മാലിനി കുറുപ്പ്‌, പെരുന്പടപ്പിൽ മഹിളാ കോൺഗ്രസ് ബ്ലോക്ക് സെക്രട്ടറി ഹസീന നജീബ്, -കച്ചേരിപ്പടിയിൽ ഐഎൻടിയുസി നേതാവ്‌ കെ കെ നിഷാദ്‌, നന്പ്യാപുരത്ത്‌ മഹിളാ കോൺഗ്രസ് സെൻട്രൽ മണ്ഡലം സെക്രട്ടറി റഹീസ സലാം, കൽവത്തിയിൽ വനിതാ ലീഗ്‌ ജില്ലാസെക്രട്ടറി സജി കബീർ, മൂലങ്കുഴിയിൽ സോഫി രാജു തുടങ്ങിയവരാണ്‌ വിമതരായി രംഗത്തുള്ളത്‌. 2,3,6,8,71 ഡിവിഷനുകളിലും വിമതരുണ്ട്‌.

തൃക്കാക്കര നഗരസഭയിൽ മഹിളാ കോൺഗ്രസ് ജില്ലാ സെക്രട്ടറി ലിജി സുരേഷ്, ബ്ലോക്ക് വൈസ് പ്രസിഡന്റ് ബാബു ആന്റണി, സെൻട്രൽ മണ്ഡലം വൈസ് പ്രസിഡന്റ്‌ സുനീർ കെ ബാവ, കർഷക കോൺഗ്രസ് മണ്ഡലം പ്രസിഡന്റ് നാസർ തൃക്കാക്കര എന്നിവരാണ്‌ പത്രിക നൽകിയത്‌.

ആലുവ നഗരസഭയിൽ മുൻ ചെയർപേഴ്സൺ ലിസി എബ്രഹാം, മുൻ കൗൺസിലർ ലീന ജോർജ്‌, ന്യൂനപക്ഷ കോൺഗ്രസ് ജില്ലാ സെക്രട്ടറി സാബു പരിയാരത്ത്, മഹിളാ കോൺഗ്രസ് പ്രവർത്തക സീന ബഷീർ എന്നിർ വിമതരാണ്‌. കോൺഗ്രസ് മുൻ കൗൺസിലർമാരായ കെ വി സരള, സെബി വി ബാസ്റ്റിൻ, കെ ജയകുമാർ, ടിൻസി വർഗീസ് എന്നിവർ സ്വതന്ത്രരായും മത്സരിക്കുന്നു.

അങ്കമാലി നഗരസഭയിൽ കോൺഗ്രസ് നേതാവ് സെബി വർഗീസ് വിമതസ്ഥാനാർഥിയാണ്‌.

കൂത്താട്ടുകുളം നഗരസഭയിൽ ജിൻസ്‌ പൈറ്റകുളം, സോണി തോമസ്‌ എന്നിവരും പിറവത്ത്‌ ലാലു മത്തായി, അനിത സജി, സിനി ജോയി, തമ്പി പുതുവാക്കുന്നേൽ എന്നിവരും വിമതരായി പത്രിക നൽകി. മുളന്തുരുത്തി ബ്ലോക്ക്‌ ഡിവിഷനിലും വിമതനുണ്ട്‌. മൂവാറ്റുപുഴ നഗരസഭ ഒന്നാംവാർഡിലും മേക്കടമ്പ് ബ്ലോക്ക്‌ ഡിവിഷനിലും വിമതർ പത്രിക നൽകി.

പെരുമ്പാവൂർ നഗരസഭയിൽ മുൻ ചെയർപേഴ്സൺ മിനി ജോഷി സ്വതന്ത്രയായി മത്സരിക്കും.

വാളകം പഞ്ചായത്തിലെ 4,13,14 വാർഡുകളിലും മാറാടി പഞ്ചായത്തിലെ രണ്ടാംവാർഡിലും കോൺഗ്രസ് വിമതരും പത്തിൽ കേരള കോൺഗ്രസ് (ജോസഫ്) വിമതനും പത്രിക നൽകി. പായിപ്ര പഞ്ചായത്തിലെ 4,10 വാർഡുകളിൽ ലീഗ് പ്രവർത്തകർ വിമതരാണ്‌.

പാമ്പാക്കുട പഞ്ചായത്തിൽ 15 വാർഡുകളിലും പഞ്ചായത്ത് പ്രദേശത്തെ മൂന്ന് ബ്ലോക്ക് ഡിവിഷനുകളിലും കോൺഗ്രസ് വിമതവിഭാഗം ഐക്യമുന്നണി എന്ന പേരിൽ പത്രിക സമർപ്പിച്ചു.

പറവൂരിലെ കരുമാല്ലൂർ, ചിറ്റാറ്റുകര പഞ്ചായത്തുകളിലെ ഒന്നുവീതം വാർഡുകളിൽ മഹിളാ കോൺഗ്രസ്‌, കോൺഗ്രസ്‌ നേതാക്കൾ വിമതരായുണ്ട്‌.