കുടുംബശ്രീ മാതൃക പഠിക്കാൻ ഒഡിഷ സംഘം കൊച്ചിയിൽ

കൊച്ചി

കേരളത്തിലെ കുടുംബശ്രീയുടെ പ്രവർത്തനങ്ങൾ നേരിട്ടു മനസ്സിലാക്കാൻ ഒഡിഷയിൽനിന്നുള്ള ‘മിഷൻ ശക്തി' പ്രതിനിധിസംഘം ജില്ലയിലെത്തി. സുബർണപുർ ജില്ലയിൽനിന്നുള്ള സംഘമാണ് ജില്ലയിലെ വിവിധ പദ്ധതികൾ സന്ദർശിച്ചത്. എറണാകുളം ജില്ലാ മിഷൻ ഓഫീസിലെത്തിയ സംഘം ജില്ലാ ടീമുമായി ആശയവിനിമയം നടത്തി.

കെ -ഫോർ കെയർ, സാന്ത്വനം മിത്രം, ഹരിതകർമസേന തുടങ്ങിയ പദ്ധതികളുടെ പ്രവർത്തനരീതിയും നേട്ടങ്ങളും അവതരിപ്പിച്ചു. പദ്ധതികളുടെ പ്രവർത്തനരീതി, നേട്ടങ്ങൾ, സമൂഹത്തിൽ ഉണ്ടാക്കുന്ന സ്വാധീനം എന്നിവ സംഘം വിലയിരുത്തി.

കുടുംബശ്രീയുടെ ഘടനയെക്കുറിച്ചും വരുമാനോൽപ്പാദന പദ്ധതികളെക്കുറിച്ചും ജില്ലാ മിഷൻ കോ-–ഓർഡിനേറ്റർ ടി എം റെജീന വിശദീകരിച്ചു. എടത്തലയിലെ ന്യൂട്രിമിക്സ് യൂണിറ്റും അങ്കമാലിയിലെ പ്രീമിയം കഫെയും സംഘം സന്ദർശിച്ചു. ജില്ലാ പ്രോഗ്രാം മാനേജർമാരായ കെ എം അനൂപ്, പി എ അജിത് എന്നിവരും സംഘത്തോടൊപ്പമുണ്ടായി. കേരളത്തിലെ സ്ത്രീശാക്തീകരണ മാതൃകകൾ ഒഡിഷയിൽ നടപ്പാക്കുന്നതിന്റെ ഭാഗമായാണ്‌ സന്ദർശനം. സംഘം രണ്ടുദിവസംകൂടി കേരളത്തിൽ തുടരും.