വികസനം എണ്ണിപ്പറഞ്ഞ്‌ കീഴ്‌മാട്‌

ആലുവ

വാഴക്കുളം ബ്ലോക്ക് പഞ്ചായത്ത് പ്രസിഡന്റെന്ന നിലയിൽ കീഴ്‌മാട്‌, വാഴക്കുളം പഞ്ചായത്തുകളിൽ നടപ്പാക്കിയ വികസനപ്രവർത്തനങ്ങൾ എണ്ണിപ്പറഞ്ഞ്‌ ജില്ലാപഞ്ചായത്ത്‌ കീഴ്‌മാട്‌ ഡിവിഷൻ എൽഡിഎഫ് സ്ഥാനാർഥി കെ എം അൻവർ അലി.

വാഴക്കുളം ചെമ്പറക്കി നടക്കാവിൽ ബ്ലോക്ക് പഞ്ചായത്ത് 41 ലക്ഷം രൂപ ചെലവിൽ നിർമിച്ച ടേക് എ ബ്രേക് വഴിയോരവിശ്രമകേന്ദ്രം, ഒരുകോടി രൂപ ചെലവിൽ നടപ്പാക്കിയ അടിസ്ഥാനസൗകര്യ വികസനം, സർക്കാർ നേരിട്ട് ഡിവിഷനിൽ നടപ്പാക്കിയ കുട്ടമശേരി, വാഴക്കുളം സ്കൂളുകളുടെ നവീകരണം ഉൾപ്പെടെയുള്ള നിരവധി വികസനപ്രവർത്തനങ്ങൾ ജനങ്ങളിലേക്ക് എത്തിച്ചാണ് എൽഡിഎഫ് സ്ഥാനാർഥിയുടെ പ്രചാരണം.

പോഞ്ഞാശേരി കോട്ടപ്പടി വീട്ടിൽ കെ എം അൻവർ അലി ആലുവ അശോക ടെക്സ്റ്റൈൽ കമ്പനി ജീവനക്കാരനായിരുന്നു. 2005 മുതൽ 2015 വരെ വെങ്ങോല പഞ്ചായത്ത്‌ അംഗം. നിലവിൽ വാഴക്കുളം ബ്ലോക്ക് പഞ്ചായത്ത് പ്രസിഡന്റാണ്. ബ്ലോക്ക് പഞ്ചായത്ത് പ്രസിഡന്റ്‌ അസോസിയേഷൻ ജില്ലാ സെക്രട്ടറി, സിപിഐ എം വെങ്ങോല ലോക്കൽ കമ്മിറ്റി അംഗം, സിഐടിയു പെരുമ്പാവൂർ ഏരിയ ജോയിന്റ്‌ സെക്രട്ടറി, ഹെഡ്‌ലോഡ് ആൻഡ്‌ ജനറൽ വർക്കേഴ്സ് യൂണിയൻ പെരുമ്പാവൂർ ഏരിയ പ്രസിഡന്റ് എന്നീ നിലകളിലും പ്രവർത്തിക്കുന്നു. ഭാര്യ: ബേനസീർ. മക്കൾ: അൽബിന അൻവർ, ആദിൽ അൻവർ.

കീഴ്‌മാട്‌, വാഴക്കുളം പഞ്ചായത്തുകൾ ഉൾപ്പെടുന്നതാണ്‌ ഡിവിഷൻ.

കോൺഗ്രസ് പെരുമ്പാവൂർ ബ്ലോക്ക് പ്രസിഡന്റ്‌ പി എ മുക്താറാണ് പ്രധാന എതിരാളി. വെങ്ങോല പഞ്ചായത്ത് അംഗവും മുൻ വൈസ് പ്രസിഡന്റുമാണ്. ബിജെപി എറണാകുളം നോർത്ത് ജില്ലാ വൈസ് പ്രസിഡന്റ്‌ എ സെന്തിൽ കുമാറാണ് എൻഡിഎ സ്ഥാനാർഥി. വാഴക്കുളം ബിജെപി ആലുവ മണ്ഡലം പ്രസിഡന്റ്‌, സെക്രട്ടറി എന്നീ നിലകളിൽ പ്രവർത്തിച്ചിട്ടുണ്ട്‌.