കോഴിപ്പിള്ളിയിൽ 
24 ദിവസമായി കുടിവെള്ളമില്ല

കൂത്താട്ടുകുളം

പാലക്കുഴ പഞ്ചായത്തിലെ കോഴിപ്പിള്ളിയിൽ 24 ദിവസമായി കുടിവെള്ളമില്ല. ജലനിധി പദ്ധതിയിൽനിന്നുള്ള കുടിവെള്ളമാണ് പ്രദേശത്തെ ഇരുനൂറിലേറെ കുടുംബങ്ങളിൽ വിതരണം ചെയ്യുന്നത്. നിരവധിതവണ പരാതി പറഞ്ഞെങ്കിലും അനുകൂലനടപടിയുണ്ടാകാത്ത സാഹചര്യത്തിൽ സിപിഐ എം ലോക്കൽ കമ്മിറ്റിയുടെ നേതൃത്വത്തിൽ ഗുണഭോക്താക്കൾ പഞ്ചായത്തിലെത്തി സൂചനാസമരം നടത്തി. വ്യാഴംമുതൽ ജലവിതരണം പുനരാരംഭിക്കുമെന്ന് പ്രസിഡന്റ്‌ ടി എൻ സുനിൽ നേതാക്കളോട് ഉറപ്പുപറഞ്ഞു. ലോക്കൽ സെക്രട്ടറി ജോഷി സ്കറിയ, എൻ എം ജോർജ്, പി എൻ സജീവൻ, വി ടി ജയൻ, ജിബി സാബു, സിജി ബിനു എന്നിവർ നേതൃത്വം നൽകി.