കോൺഗ്രസ്‌–ജമാഅത്തെ ഇസ്ലാമി– ബിജെപി കൂട്ടുകെട്ട്‌ ; പറവൂരിലെ മഴവിൽസഖ്യം 
മതനിരപേക്ഷത തകർക്കാൻ

കൊച്ചി

പ്രതിപക്ഷനേതാവ്‌ വി ഡി സതീശന്റെ പറവൂർ മണ്ഡലത്തിൽ തദ്ദേശ വാർഡുകളിൽ തീവ്രവർഗീയ കക്ഷികളുമായി കോൺഗ്രസ്‌ ഉണ്ടാക്കിയിട്ടുള്ള അവിശുദ്ധ കൂട്ടുകെട്ട്‌ മതനിരപേക്ഷ കേരളത്തെ തകർക്കാനെന്ന്‌ സിപിഐ എം ജില്ലാ സെക്രട്ടറി എസ്‌ സതീഷ്‌. ജമാഅത്തെ ഇസ്ലാമിയെയും ബിജെപിയെയും ഒരുപോലെ ചേർത്തുപിടിച്ചാണ്‌ വി ഡി സതീശന്റെ മഴവിൽ സഖ്യം. ആസന്നമായ നിയസഭാ തെരഞ്ഞെടുപ്പുകൂടി മുന്നിൽക്കണ്ടാണിതെന്നും സതീഷ്‌ വാർത്താസമ്മേളനത്തിൽ പറഞ്ഞു.

പറവൂരിൽ എവിടെയും മുസ്ലിംലീഗിന്‌ ഒരു സീറ്റ്‌ പോലും നൽകാത്ത വി ഡി സതീശൻ ജമാ അത്തെ ഇസ്ലാമിയെ യുഡിഎഫ്‌ ഘടകകക്ഷിയായാണ്‌ പരിഗണിച്ചത്‌. ചിറ്റാറ്റുകര പഞ്ചായത്തിൽ 2020 ൽ കോൺഗ്രസിന്‌ 274 വോട്ടുലഭിച്ച പഴയ 16–ാംവാർഡിൽ (പുതിയത്‌ 18) വെൽഫെയർ പാർടി കോ–ഓർഡിനേറ്ററായ കെ കെ നാസറാണ്‌ ഇക്കുറി യുഡിഎഫ്‌ സ്ഥാനാർഥി. 2020ൽ വെൽഫെയർ പാർടി 271 വോട്ട്‌ പിടിച്ച വാർഡാണിത്‌. ചിറ്റാറ്റുകരയിൽ തന്നെ, 2020 ൽ എൽഡിഎഫ്‌ വിജയിച്ച ഒന്പതാംവാർഡിൽ ജമാ അത്തെ ഇസ്ലാമിയുടെ സെറീന അബ്‌ദുൾ ജബ്ബാർ ഇക്കുറി കൈപ്പത്തി ചിഹ്നത്തിൽ മത്സരിക്കുന്നു. 2020 ൽ ഇവിടെ വെൽഫെയർ പിന്തുണയോടെയാണ്‌ യുഡിഎഫ്‌ മത്സരിച്ചത്‌. കോട്ടുവള്ളി പഞ്ചായത്ത്‌ ആറാംവാർഡിൽ 2020 ൽ വെൽഫെയർ സ്ഥാനാർഥിയായി വിജയിച്ച സുമയ്യ ടീച്ചർ ഇക്കുറി ഇവിടെ യുഡിഎഫ്‌ സ്ഥാനാർഥിയാണ്‌. ആലങ്ങാട്‌ ബ്ലോക്ക്‌ ഡിവിഷനിൽ ജമാഅത്തെ ഇസ്ലാമിയുടെ കളമശേരി മണ്ഡലം നേതാവ്‌ എൻ എ സിറാജുദ്ദീൻ യുഡിഎഫ്‌ സ്വതന്ത്രനാണ്‌.

പരസ്‌പര സഹകരണത്തിന്റെ ഭാഗമായി പറവൂർ നഗരസഭയിലെ ഒന്ന്‌, 12, 30 വാർഡുകളിൽ ബിജെപിക്ക്‌ സ്ഥാനാർഥിയില്ല. വടക്കേക്കര പഞ്ചായത്തിൽ 20, 21, 14 (പഴയ 14 ഉം 15 ഉം), 9 വാർഡുകളിലും ഏഴിക്കരയിലെ 2, 3, 15, 11 വാർഡുകളിലും ആയിരത്തിലേറെ വോട്ട്‌ കിട്ടുന്ന പറവൂർ ബ്ലോക്ക്‌ ചേന്ദമംഗലം ഡിവിഷനിലും ബിജെപിക്ക്‌ ഇക്കുറി സ്ഥാനാർഥിയില്ല.

ഇ‍ൗ സാഹചര്യത്തിൽ, പറവൂർ മണ്ഡലത്തിൽ ഉൾപ്പെട്ട കടമക്കുടി ജില്ലാപഞ്ചായത്ത്‌ ഡിവിഷനിൽ കോൺഗ്രസ്‌ സ്ഥാനാർഥിയുടെ പത്രിക തള്ളിപ്പോയത്‌ ബിജെപിയുമായുള്ള ധാരണയുടെ ഭാഗമാണെന്ന്‌ സംശയിക്കേണ്ടിയിരിക്കുന്നു. കടമക്കുടി ഡിവിഷനിൽ ഇപ്പോൾ എൽഡിഎഫിനെ നേരിടുന്നത്‌ ബിജെപിയാണ്‌. ഇവിടെ യുഡിഎഫിന്‌ ഡമ്മി സ്ഥാനാർഥിപോലുമുണ്ടായിരുന്നില്ല എന്നതും പരിശോധിക്കപ്പെടേണ്ടതാണ്‌.

വർഗീയതയുമായി സന്ധിയില്ലെന്ന നിലപാടാണ്‌ എൽഡിഎഫിനുള്ളത്‌. പറവൂരിൽ വി ഡി സതീശൻ രൂപപ്പെടുത്തിയ അവിശുദ്ധസഖ്യം കേരളത്തിന്റെ മതനിരപേക്ഷതയെ തകർക്കാനുള്ള രാഷ്‌ട്രീയ അർബുദമാണ്‌. അതേക്കുറിച്ച്‌ കോൺഗ്രസിൽ മതനിരപേക്ഷ നിലപാടുള്ളവർ ചിന്തിക്കണം. കോൺഗ്രസിന്റെ ഗൂഢപദ്ധതി ജനാധിപത്യ, മതനിരപേക്ഷ സമൂഹം ചെറുത്തുതോൽപ്പിക്കുമെന്നും എസ്‌ സതീഷ്‌ പറഞ്ഞു.