സ്പെഷ്യലാണ് 
ഇർഫാന്റെ രക്തദാനം

കളമശേരി

ഭിന്നശേഷിക്കാരനായ ഇർഫാൻ രക്തം ദാനം ചെയ്ത് ശ്രദ്ധേയനായി. ബ്ലഡ് ഡോണേഴ്സ് കേരള അവരുടെ ബിഡികെ എന്ന ഫേസ്ബുക്ക് പേജിൽ ഇർഫാന്റെ ഫോട്ടോ വെച്ച് "ഞാൻ സ്പെഷ്യൽ ആണ്. നിങ്ങൾക്കും സ്പെഷ്യൽ ആകാം; രക്തദാനത്തിലൂടെ' എന്ന ടാഗ് ലൈനിൽ ഇർഫാന്റെ രക്തദാനം ആഘോഷമാക്കി.

ഏലൂർ പാതാളത്ത് കൊല്ലംപറമ്പിൽ സക്കീറിന്റെ മകൻ ഭിന്നശേഷിക്കാരനായ ഇരുപതുകാരനായ ഇർഫാൻ ഏലൂർ ബഡ്സ് സ്കൂൾ വിദ്യാർഥിയാണ്. കുറച്ചുനാൾ മുമ്പ് ബാപ്പയുടെ കൂട്ടുകാരന്

ശസ്ത്രക്രിയക്ക് രക്തം ആവശ്യമായിവന്നു. എ പോസിറ്റീവ് രക്തഗ്രൂപ്പുള്ള ഇർഫാനോട് സക്കീർ അഭിപ്രായം ചോദിച്ചു. ഇർഫാന് ഏറെ സമ്മതം. പക്ഷെ രക്തം നൽകേണ്ട ദിവസം പെട്ടെന്നുണ്ടായ അസൗകര്യത്തെ തുടർന്ന് പോകാനായില്ല. കഴിഞ്ഞദിവസം മുപ്പത്തിനാലുകാരനായ പാലക്കാട് സ്വദേശിക്ക് എ പോസിറ്റീവ് രക്തം ആവശ്യമാണെന്ന് അറിഞ്ഞു. അതോടെ ബിഡികെയുമായി ബന്ധപ്പെട്ട് അമൃത ആശുപത്രിയിലെത്തി രക്തം നൽകി. ഓട്ടിസം ബാധിച്ചൊരാൾ മുമ്പ് രക്തം നൽകിയതായി അറിവില്ലെന്നാണ് ഈ രംഗത്തുള്ളവർ പറയുന്നത്.

രക്തം ദാനം ചെയ്തതോടെ ഇർഫാനും പിതാവ് സക്കീറിനും ഏറെ പ്രശംസയോടെ ബിഡികെ ടീം രംഗത്തുവന്നു. മാതൃകാപരമായ പ്രവർത്തനത്തിന് ഇരുവർക്കും അഭിനന്ദനമർപ്പിച്ചു.

2021ൽ കോവിഡ് കാലത്ത് തനിക്ക് കിട്ടിയ പെൻഷൻതുക മുഖ്യമന്ത്രിയുടെ ദുരിതാശ്വാസ നിധിയിലേക്ക് ഇർഫാൻ നൽകിയിരുന്നു.