ലീഗ്‌ മത്സരിക്കുന്ന വാർഡുകളിൽ
തെരഞ്ഞെടുപ്പ്‌ ബഹിഷ്‌കരിക്കാൻ കോൺഗ്രസ്‌

പടന്ന

പടന്ന പഞ്ചായത്തിൽ സീറ്റുകളെച്ചൊല്ലിയുള്ള മുസ്ലിംലീഗ്‌– കോൺഗ്രസ്‌ തർക്കം തെരഞ്ഞെടുപ്പ്‌ ബഹിഷ്‌കരണത്തിലേക്ക്‌ നീങ്ങുന്നു. രണ്ട്‌, മൂന്ന്‌ വാർഡുകൾ മുസ്ലിംലീഗിന്‌ നൽകാനുള്ള ഡിസിസി തീരുമാനത്തിൽ പ്രതിഷേധിച്ച്‌ ലീഗ്‌ മത്സരിക്കുന്ന വാർഡുകളിൽ തെരഞ്ഞെടുപ്പ്‌ ബഹിഷ്‌കരിക്കാൻ കോൺഗ്രസ്‌ ബൂത്തു്‌ കമ്മിറ്റികൾ തീരുമാനിച്ചു. പഞ്ചായത്തിൽ 16 വാർഡിൽ എട്ടിടത്താണ് കോൺഗ്രസ് മത്സരിക്കുന്നത്. മറ്റിടങ്ങളിൽ മുസ്ലിം ലീഗും. ഈ വാർഡുകളിൽ കോൺഗ്രസ്‌ പ്രവർത്തകർ വോട്ടുചെയ്യാനെത്തില്ല. മുസ്ലിംലീഗ് നിയന്ത്രണത്തിൽ പ്രവർത്തിക്കുന്ന പടന്ന സർവീസ്‌ സഹകരണ ബാങ്കിൽ കോൺഗ്രസിന്റെ ഡയറക്ടർമാർ രാജിവെക്കാനും തീരുമാനിച്ചിട്ടുണ്ട്‌. വർഷങ്ങളായി മുന്നണിയിലെ നേതാക്കൾ തമ്മിൽ തുടരുന്ന അനൈക്യം പരിഹരിക്കാൻ ഡിസിസി നേതൃത്വം ഇടപെടാത്തതിൽ പ്രതിഷേധിച്ച് മണ്ഡലം പ്രസിഡന്റ്‌ സജീവൻ സ്ഥാനംഒഴിഞ്ഞതിനുപിന്നാലെയാണ് പുതിയ തീരുമാനവുമായി ബൂത്ത് കമ്മിറ്റികൾ രംഗത്തെത്തിയത്‌. പഞ്ചായത്ത് യുഡിഎഫ് കൺവീനറും മണ്ഡലം സെക്രട്ടറിയുമായ പി കെ താജുദ്ദീൻ മത്സരിക്കുന്ന പതിമൂന്നാം വാർഡിൽ സ്വതന്ത്ര സ്ഥാനാർഥിയായ പി കെ സമീറിനായി എടച്ചാക്കൈ ശാഖ മുസ്ലിം ലീഗ് നേതൃത്വത്തിൽ പൂർണമായും രംഗത്തിറങ്ങി പ്രവർത്തിക്കുന്നു. മുസ്ലിം ലീഗിന് ഭൂരിപക്ഷമുള്ള വാർഡ് വർഷങ്ങളായി കോൺഗ്രസിന് വിട്ടു നൽകിയതിനെ ചൊല്ലിയാണ് ഇവിടെ തർക്കം.തെരഞ്ഞെടുപ്പടുത്തിട്ടും പഞ്ചായത്തിൽ യുഡിഎഫ്‌ കൺവൻഷൻ ചേരാനായിട്ടില്ല.