ഇളകില്ല കയ്യൂർകോട്ട

കയ്യൂർ

കയ്യൂരിലെയും ചീമേനിയിലെ രണധീരരുടെ സ്‌മരണ തുടിക്കുന്ന മണ്ണാണ്‌ ജില്ലാ പഞ്ചായത്ത്‌ കയ്യൂർ ഡിവിഷൻ. കരിന്തളം ഡിവിഷനാണ്‌ പുനർനിർണയശേഷം കയ്യൂർ ഡിവിഷനായി മാറിയത്‌. എന്നും ഇടതുപക്ഷത്തെ മാത്രം വിജയിച്ച പാരന്പര്യമാണ്‌ ഡിവിഷനുള്ളത്‌. അത്‌ ഇത്തവണയും ആവർത്തിക്കുമെന്ന കാര്യത്തിൽ എതിരാളികൾക്കും മറിച്ചൊരു അഭിപ്രായമില്ല. പരപ്പ ബ്ലോക്ക്‌ പഞ്ചായത്തിലെ പരപ്പ, കിനാനൂർ, എളേരി, നീലേശ്വരം ബ്ലോക്ക്‌ പഞ്ചായത്തിലെ കയ്യൂർ, ചീമേനി എന്നീ ഡിവിഷനുകൾ ഉൾപ്പെട്ടതാണ്‌ ജില്ലാ പഞ്ചായത്ത്‌ കയ്യൂർ ഡിവിഷൻ. ആകെ 37 പഞ്ചായത്ത്‌ വാർഡുകൾ. കിനാനൂർ കരിന്തളം പഞ്ചായത്തിലെ 19ൽ 15 ഉം, കയ്യൂർ ചീമേനിയിലെ 17ൽ 14 ഉം, വെസ്‌റ്റ്‌ എളേരിയിലെ 19ൽ 8 ഉം വാർഡുകളാണ്‌ ഡിവിഷനിൽ ഉൾപ്പെടുന്നത്‌. ഡിവിഷനിൽ ഉൾപ്പെട്ട അഞ്ച്‌ ബ്ലോക്ക്‌ പഞ്ചായത്ത്‌ ഡിവിഷനും നിലവിൽ എൽഡിഎഫ്‌ വിജയിച്ചവ. കയ്യൂർ ചീമേനി, കിനാനൂർ കരിന്തളം പഞ്ചായത്തുകൾ എൽഡിഎഫും വെസ്‌റ്റ്‌ എളേരി യുഡിഎഫും ഭരിക്കുന്നു. ഡിവിഷനിൽ ഉൾപ്പെട്ട 37 പഞ്ചായത്ത്‌ വാർഡുകളിൽ 29 ഉം എൽഡിഎഫ്‌ വിജയിച്ചവ. കിനാനൂർ കരിന്തളത്ത്‌ രണ്ടും കയ്യൂർ ചീമേനിയിലും വെസ്‌റ്റ്‌ എളേരിയിലും ഓരോ വാർഡും പുതുതായി വർധിച്ചിട്ടുണ്ട്‌. കോടോം ബേളൂർ പഞ്ചായത്തിലെ ആറുവാർഡും പിലിക്കോട്ടെ ഒരു വാർഡും ഒഴിവാക്കി വെസ്‌റ്റ്‌ എളേരിയിലെ എട്ട്‌ വാർഡുകൾ കൂട്ടിച്ചേർത്തതാണ്‌ ഡിവിഷനിലുണ്ടായ മാറ്റം. എൽഡിഎഫ്‌ പ്രതിനിധി സിപിഐ എമ്മിലെ കെ ശകുന്തളയാണ്‌ നിലവിലെ ജില്ലാ പഞ്ചായത്തംഗം. 11,172 വോട്ടിന്റെ ഭൂരിപക്ഷത്തിനാണ്‌ അവർ വിജയിച്ചത്‌. ത്രിതല പഞ്ചായത്തുകളും സംസ്ഥാന സർക്കാരും ഡിവിഷനിൽ നടപ്പാക്കിയ എണ്ണമറ്റ വികസന പ്രവൃത്തികൾ നിരത്തിയാണ്‌ എൽഡിഎഫ്‌ വോട്ടർമാരെ സമീപിക്കുന്നത്‌. പൊതുപ്രവർത്തനരംഗത്ത്‌ ദീർഘകാല അനുഭവ പാരന്പര്യമുള്ള സിപിഐ എം ജില്ലാ കമ്മിറ്റിയംഗം ഒക്ലാവ്‌ കൃഷ്‌ണനാണ്‌ എൽഡിഎഫ്‌ സ്ഥാനാർഥി. ആദിവാസി ക്ഷേമസമിതിയുടെ സംസ്ഥാന കമ്മിറ്റി അംഗവും ജില്ലാ സെക്രട്ടറിയുമായിരുന്നു അദ്ദേഹം. കോൺഗ്രസിലെ സുന്ദരൻ ഓറളയാണ്‌ യുഡിഎഫ്‌ സ്ഥാനാർഥി. ബിജെപിയുടെ ടി ഡി ഭരതനും മത്സരരംഗത്തുണ്ട്‌.