ഡൽഹി ചലോയുടെ സമരവീര്യം

ചട്ടഞ്ചാൽ

രാജ്യതലസ്ഥാനത്ത്‌ അരങ്ങേറിയ ഐതിഹാസികമായ ‘ഡൽഹി ചലോ’ കർഷകസമരത്തിലെ യുവരക്തമായിരുന്നു അദ്‌നാൻ. എസ്എഫ്ഐ ഉദുമ ഏരിയ സെക്രട്ടറിയും ജില്ലാവൈസ് പ്രസിഡന്റുമായ അദ്‌നാൻ രാജ്യവ്യാപകമായി പ്രതിഷേധത്തിന്‌ തിരികൊളുത്തിയ ദൽഹി ചലോ മാർച്ചിൽ രണ്ടാഴ്‌ചക്കാലമാണ്‌ പങ്കാളിയായത്‌. ട്രാക്ടറും വിണ്ടുകീറിയ പാദങ്ങളും വിശപ്പിന്റെ മുദ്രാവാക്യങ്ങളും ഭരണസിരാകേന്ദ്രത്തെ പിടിച്ചുലച്ച നാളുകളുടെ അനുഭവക്കരുത്തുമായാണ്‌ അദ്‌നാൻ കാസർകോട്‌ ബ്ലോക്ക്‌ പഞ്ചായത്തിലെ തെക്കിൽ ഡിവിഷനിൽ നിന്ന്‌ മത്സരിക്കുന്നത്‌. കർഷക സമരത്തിലെ ജില്ലയിൽ നിന്നുള്ള പ്രായം കുറഞ്ഞ പോരാളിയായ അദ്‌നാൻ(24) തദ്ദേശപ്പോരാട്ടത്തിലെയും യുവരക്തമാണ്‌. ​അദ്‌നാൻ എന്നതിന് അറബിയിൽ സ്ഥിരതയുള്ളവൻ, നിലപാടുള്ളവൻ എന്നാണർഥം. പേരിനെ അന്വർഥമാക്കുന്നതാണ്‌ അദ്‌നാന്റെ പോരാട്ടം. കർഷകസമരത്തിന്റെ ആത്മവീര്യവും വിദ്യാർഥി അവകാശ പോരാട്ടങ്ങളിലെ കരുത്തും അദ്‌നാനിൽ വേണ്ടുവോളമുണ്ട്‌. ജയിച്ചാൽ കാർഷികമേഖലയുടെ ഉന്നതിക്കായുള്ള ഇടപെടലാണ്‌ പ്രധാന ദ‍ൗത്യം. യുവജനങ്ങളുടെയും വിദ്യാർഥികളുടെയും ആവശ്യങ്ങൾക്കൊപ്പമുണ്ടാകും. കളിസ്ഥലമെന്നത് യുവാക്കളുടെ സ്വപ്നമാണ്. അതിനായി പ്രയത്നിക്കും. രാഷ്ട്രീയഭേദമന്യേ എല്ലാവരേയും ഉൾക്കൊള്ളുന്നതാണ്‌ എന്റെ രാഷ്ട്രീയമെന്ന്‌ അദ്‌നാൻ പറയുന്നു. മുന്നാട് പീപിൾസ് കോളജിൽ യുയുസിയായി മത്സരിച്ചിട്ടുണ്ട്. ഓട്ടോറിക്ഷ ഡ്രൈവറായിരുന്ന ഉപ്പ അഷറഫ് വാഹനാപടകത്തിൽ മരിക്കുമ്പോൾ അദ്‌നാന് അഞ്ചുവയസ്‌ മാത്രം. ചെമ്മനാട് പഞ്ചായത്തിലെ ആറുമുതൽ 12 വരെയുള്ള ഏഴു വാർഡുകൾ ഉൾപ്പെടുന്ന ബെണ്ടിച്ചാൽ ഡിവിഷനെ വിഭജിച്ചാണ് തെക്കിൽ ഡിവിഷൻ രൂപികരിച്ചത്.