പരിഷത്ത് ജനകീയ മാനിഫെസ്റ്റോ തയ്യാറാക്കും

കണ്ണൂർ

തദ്ദേശ സ്വയംഭരണ സ്ഥാപനങ്ങളുടെ തെരഞ്ഞെടപ്പിന്റെ പശ്ചാത്തലത്തിൽ കേരള ശാസ്ത്രസാഹിത്യ പരിഷത്ത് ജനകീയ മാനിഫെസ്റ്റോ തയ്യാറാക്കും. ഓരോ പഞ്ചായത്തിന്റെയും നഗരസഭകളുടെയും പ്രാദേശിക സാധ്യത പരിഗണിച്ചാണ് മാനിഫെസ്റ്റോ തയ്യാറാക്കുക. ഇത് വിവിധ രാഷ്ട്രീയ നേതൃത്വത്തിന് കൈമാറും. വാർഡ് അടിസ്ഥാനത്തിൽ ഫോക്കസ് ഗ്രൂപ്പ് ചർച്ചകൾ നടത്തും. അതിന് മുന്നോടിയായി ഈ അഞ്ച് വർഷം നടത്തിയ പ്രവർത്തനങ്ങളുടെ വിവര ശേഖരണം നടത്തും. ഇതിൽ കണ്ടെത്തിയ പോരായ്മകൾ പരിഹരിക്കുന്നതും പുതിയ നിർദേശം ഉൾപ്പെടുന്നതമായിരിക്കും മാനിഫെസ്റ്റോ. വിവരശേഖരണത്തിനും ഫോക്കസ് ഗ്രൂപ്പ് ചർച്ചക്കും ശേഷം പഞ്ചായത്ത്, മുൻസിപ്പൽ തലത്തിൽ വികസന കോൺഗ്രസ്‌ സംഘടിപ്പിക്കും. ജില്ലാതല വികസന സെമിനാർ പരിഷത്ത് സംസ്ഥാന വികസന സമിതി കൺവീനർ പി എ തങ്കച്ചൻ ഉദ്ഘാടനം ചെയ്തു. പി വി രത്നാകരൻ അധ്യക്ഷനായി. വി വി ബാലകൃഷ്ണൻ, കെ കെ സുഗതൻ, ടി വി വിജയൻ, കെ വിനോദ്കുമാർ, പി വി ജയശ്രി, ബിജു നിടുവാലൂർ, കെ ഗോവിന്ദൻ എന്നിവർ സംസാരിച്ചു.