അസുഖത്തെ 
പേടിയില്ലിപ്പോൾ

ആലത്തൂർ

കേരളത്തിന്റെ ആരോഗ്യരംഗം മാറിയതിന്റെ തലയെടുപ്പുള്ള കാഴ്‌ചയാണ്‌ ആലത്തൂർ താലൂക്ക്‌ ആശുപത്രി. സൂപ്പർ സ്പെഷ്യാലിറ്റി ആശുപത്രിയോട്‌ കിടപിടിക്കുന്ന സ‍ൗകര്യങ്ങൾ. പതിനാറ്‌ പഞ്ചായത്തിലെ ജനങ്ങൾ ആശ്രയിക്കുന്ന ആതുരാലയമാണിത്‌. ആധുനികരീതിയിൽ നവീകരിച്ച അത്യാഹിത വിഭാഗം, കിഫ്ബിയിൽനിന്ന്‌ 14.40 കോടി രൂപ വിനിയോഗിച്ച്‌ നിർമിച്ച പുതിയ കെട്ടിടം എന്നിവ മുഖച്ഛായ മാറ്റി. ആശുപത്രി നവീകരണത്തിന്‌ ആലത്തൂർ ബ്ലോക്ക് പഞ്ചായത്ത് സമഗ്ര മാസ്റ്റർ പ്ലാൻ തയ്യാറാക്കിയെങ്കിലും സ്ഥലപരിമിതി വിലങ്ങുതടിയായി. ആശുപത്രിയോട് ചേർന്നുള്ള ജയിലും കെട്ടിടങ്ങൾ പണിയാൻ പ്രയാസമായി. കെ ഡി പ്രസേനൻ എംഎൽഎയുടെ ഫണ്ടിൽനിന്ന്‌ 2021ൽ 1.10 കോടി രൂപ ചെലവിട്ട്‌ ആശുപത്രിയോട് ചേർന്നുള്ള 46 സെന്റ്‌ സ്ഥലം വാങ്ങി. കേരളത്തിലാദ്യമായി എംഎൽഎ ഫണ്ടിൽനിന്ന്‌ ആശുപത്രിക്ക് സ്ഥലം വാങ്ങുന്നതും അന്നാണ്. പുതിയ കെട്ടിടമായതോടെ ഞെങ്ങിഞെരുങ്ങിയ അത്യാഹിത വിഭാഗം ഓർമയായി. ലാബും എക്‌സറേ യൂണിറ്റും നവീകരിച്ചു. വിപുലമായ ഡയാലിസിസ് സെന്ററും ഐസിയു യൂണിറ്റുമുണ്ട്. ജനറൽ ഒ പി, സ്പെഷ്യാലിറ്റി ഒ പി, ലാബുകൾ, എക്‌സറേ യൂണിറ്റ്, സ്കാനിങ്‌ യൂണിറ്റ് എന്നിവ പുതിയ കെട്ടിടത്തിൽ പ്രവർത്തനം തുടങ്ങും. കിഫ്ബി പദ്ധതിയിലുൾപ്പെടുത്തി സംസ്ഥാനത്തെ 44 ആശുപത്രികളിൽ ഡയാലിസിസ് യൂണിറ്റ് ഒരുക്കിയതിലൊന്ന് ഇവിടെയാണ്.