ഒഴുകിയെത്തും ജീവജലം

ചിറ്റൂർ

അസാധ്യമെന്ന്‌ കരുതിയത്‌ യാഥാർഥ്യമാകുന്പോഴുള്ള ആഹ്ലാദപ്രവാഹം–ജില്ലയുടെ കിഴക്കൻമേഖലയിലെ മനസ്സുകളിൽ ആ ഒഴുക്കിന്റെ തുടക്കമാണ്‌. സംസ്ഥാനത്തെ ഏറ്റവും വലിയ സൂക്ഷ്​​മ ജലസേചന പദ്ധതിയായ മൂലത്തറ വലതുകര കനാൽ അടുത്തവർഷം മാർച്ചിൽ കമീഷൻ ചെയ്യും. മഴനിഴൽ പ്രദേശങ്ങളിൽ ജലമെത്തിക്കുന്ന നൂതന മാതൃകയാണിത്‌. കൊഴിഞ്ഞാമ്പാറ, എരുത്തേമ്പതി, വടകരപ്പതി എന്നീ പഞ്ചായത്തുകളെ ബന്ധിപ്പിച്ച്​ 6.92 കിലോമീറ്റർ നീളത്തിലാണ്‌ കനാൽ​. കിഫ്​ബിവഴി 262.5 കോടി വിനിയോഗിച്ചാണ്​ പണി​. 112 പില്ലറുകൾ, പാറതുരന്നുള്ള ടണൽ എന്നിവയിലൂടെയാണ്​ 10 മീറ്റർ വീതിയിൽ കനാൽ നിർമിക്കുന്നത്​. മൂലത്തറയിൽനിന്ന്​ വരട്ടയാർവരെ സ്വാഭാവിക കനാലാണ്‌. ഒന്നാംഘട്ടം പൂർത്തിയാകുന്നതോടെ നാലായിരത്തോളം ഹെക്ടർ കൃഷിക്ക്​ വെള്ളം ലഭിക്കും. രണ്ടാംഘട്ടം​ വരട്ടയാർ മുതൽ വേലന്താവളംവരെ 400 കോടിയുടെ പദ്ധതിക്ക്​​ അനുമതിയായി​. സ്ഥലമെടുപ്പിന്‌ 17.46 കോടി രൂപ ലഭ്യമായിട്ടുണ്ട്. ഇതുകൂടി പൂർത്തിയായാൽ പതിനായിരത്തോളം ഹെക്ടർ കൃഷിക്ക്​ വെള്ളം സുലഭമാകും. പറമ്പിക്കുളം– ആളിയാർ നദീജല കരാർ പ്രകാരം തമിഴ്​നാട്ടിൽനിന്ന്​ കിട്ടുന്ന വെള്ളം മൂലത്തറയിൽ സംഭരിച്ചാണ്​ വലതുകര കനാൽ വഴി എത്തിക്കുന്നത്​. പറമ്പിക്കുളം–ആളിയാർ അന്തർ സംസ്ഥാന നദീജല കരാർ പ്രകാരം വർഷം 7.25 ടിഎംസി വെള്ളം കേരളത്തിന്​ അവകാശപ്പെട്ടതാണ്‌. എന്നാൽ, അത്​ വാങ്ങിയെടുക്കുന്നതിൽ യുഡിഎഫ്​ സർക്കാരും ചിറ്റൂരിലെ മുൻ കോൺഗ്രസ് എംഎൽഎയും വീഴ്​ചവരുത്തി. അതോടെ കിഴക്കൻ മേഖല കൊടുംവരൾച്ചയിലേക്ക്​ നീങ്ങി​. 2016ൽ എൽഡിഎഫ്‌ സർക്കാർ അധികാരമേറ്റതോടെ​ പദ്ധതിക്ക്‌​ ജീവൻവച്ചു. അന്ന്​ സിപിഐ എം സംസ്ഥാന സെക്രട്ടറിയായിരുന്ന കോടിയേരി ബാലകൃഷ്​ണൻ ഇക്കാര്യത്തിൽ കിഴക്കൻ മേഖലയിലെ ജനങ്ങൾക്ക്​ ഉറപ്പുനൽകിയിരുന്നു. ​