അവർ ഇനി ഡോക്ടർമാർ

പാലക്കാട്‌

കേരളത്തിന്റെ പൊതുജനാരോഗ്യ രംഗത്തിന്‌ കരുത്തുപകരാൻ നൂറ്‌ ഡോക്ടർമാർക്കൂടി വരുന്നു. പാലക്കാട്‌ ഗവ. മെഡിക്കൽ കോളേജിൽ പ്രവേശനം നേടിയ 2019–-25 ബാച്ച്‌ എംബിബിഎസ്‌ വിദ്യാർഥികളുടെ ബിരുദദാന ചടങ്ങ്‌ ഞായർ പകൽ ഒന്നിന്‌ മെഡിക്കൽ കോളേജിൽ നടക്കും. മെഡിക്കൽ കോളേജിലെ ആറാമത്തെ ബാച്ചാണ്‌ പുറത്തിറങ്ങുന്നത്‌. നാലുവർഷ എംബിബിഎസ്‌ പഠനവും ഒരുവർഷത്തെ ഇന്റേൺഷിപ്പും കഴിഞ്ഞാണ്‌ ബിരുദദാനം നടക്കുന്നത്‌. ‌50 ആൺകുട്ടികളും 50 പെൺകുട്ടികളുമാണ്‌ ബാച്ചിലുള്ളത്‌. ആരോഗ്യവകുപ്പ്‌ മുൻ സ്‌പെഷ്യൽ സെക്രട്ടറി ഉഷ ടൈറ്റസ്‌ മുഖ്യാതിഥിയാകും. മെഡിക്കൽ കോളേജ്‌ പ്രിൻസിപ്പൽ ഡോ. എം ടി വിജയലക്ഷ്‌മി, ഡയറക്ടർ ഒ കെ മണി, സൂപ്രണ്ട്‌ ശ്രീറാം എന്നിവർ പങ്കെടുക്കും. പാലക്കാട്‌ മെഡിക്കൽ കോളേജിന്റെ ചരിത്രത്തിൽ ഒരു പൊൻതൂവൽക്കൂടിയാണ്‌ ബിരുദദാനം. ദേശീയപാതയ്‌ക്കുസമീപം യാക്കരയിൽ ഒരു അക്കാദമിക്‌ കെട്ടിടത്തിൽ മാത്രം ഒതുങ്ങിയിരുന്ന മെഡിക്കൽ കോളേജിനെ എൽഡിഎഫ്‌ സർക്കാരാണ്‌ ജില്ലയുടെ അഭിമാന സ്ഥാപനമായി വളർത്തിയത്‌. അടിസ്ഥാന സൗകര്യംപോലുമില്ലാതെ ഇന്ത്യൻ മെഡിക്കൽ കൗൺസിലിന്റെ അംഗീകാരം നഷ്ടമായ മെഡിക്കൽ കോളേജിന്‌ എ കെ ബാലൻ മന്ത്രിയായിരിക്കെയാണ്‌ സജ്ജീകരണങ്ങൾ ഒരുക്കാമെന്ന്‌ ഉറപ്പ്‌ നൽകി അംഗീകാരം വാങ്ങിയത്‌. പ്രധാന ശസ്‌ത്രക്രിയ ഉൾപ്പെടെ ചെയ്യാവുന്ന ആധുനിക ചികിത്സാ സംവിധാനങ്ങൾ ഇന്ന്‌ ഇവിടെയുണ്ട്‌. ജില്ലയിൽ നിപാ റിപ്പോർട്ട്‌ ചെയ്‌തപ്പോൾ പ്രതിരോധ പ്രവർത്തനങ്ങളുടെ കേന്ദ്രം കൂടിയായിരുന്നു മെഡിക്കൽ കോളേജ്‌.