ആശുപത്രികൾ മരുന്ന് ക്ഷാമത്തിലേക്ക്‌

പാലക്കാട്

കേരള സർക്കാർ സ്ഥാപനമായ കെഎംഎസ്‌സിഎൽ (കേരള മെഡിക്കൽ സർവീസസ്‌ കോർപറേഷൻ ലിമിറ്റഡ്) വഴി സംസ്ഥാന സർക്കാർ ആശുപത്രികളിലേക്ക് വിതരണം ചെയ്യുന്ന 850ലധികം മരുന്നുകളുടെയും സ്റ്റോക്ക് നാമമാത്രമായതോടെ മരുന്ന് ക്ഷാമം രൂക്ഷം. ഇതോടൊപ്പം മെഡിക്കൽ ഉപകരണ വിതരണവും അവതാളത്തിലാണ്. പ്രാഥമിക ആരോഗ്യ കേന്ദ്രങ്ങൾമുതൽ ജില്ലാ ആശുപത്രിവരെ ആവശ്യമായ 580ൽ അധികം ജനറിക് മരുന്നുകളും അനുബന്ധ സാമഗ്രികളും ഉൾപ്പെടുന്ന എസെൻഷ്യൽ ഡ്രഗ് ലിസ്റ്റിൽ ഉൾപ്പെടുന്നവയുടെ സ്റ്റോക്ക് ഒരാഴ്ചത്തേക്ക്‌ മാത്രമാണുള്ളത്‌. മെഡിക്കൽ കോളേജുകൾക്കും സൂപ്പർ സ്പെഷ്യാലിറ്റി ആശുപത്രികൾക്കും ആവശ്യമായ 150-ലധികം പ്രത്യേക മരുന്നുകൾ ഉൾപ്പെടുന്ന സ്പെഷ്യലിറ്റി ഡ്രഗ്സ് ലിസ്റ്റിൽ ഉൾപ്പെട്ടവയുടെ സ്റ്റോക്ക് തീർന്നു. അർബുദ ചികിത്സയ്ക്ക് ആവശ്യമായ 115ലധികം മരുന്നുകളുടെ 10 ശതമാനം സ്റ്റോക്ക് മാത്രമാണുള്ളത്. പ്രമേഹത്തിന്‌ നൽകുന്ന ഇൻസുലിൻ, മെറ്റ്ഫോർമിൻ, ഗ്ലിമിപിറൈഡ്– രക്തസമ്മർദത്തിനുള്ള ടെൽമിസാർട്ടാൻ, അംലോഡിപിൻ, എനലാപ്രിൽ– കൊളസ്ട്രോൾ, ഹൃദ്രോഗ ചികിത്സകൾക്ക് ഉപയോഗിക്കുന്ന അറ്റോർവാസ്റ്റാറ്റിൻ, ആസ്പിരിൻ, ക്ലോപ്പിഡോഗ്രൽ എന്നിവ ഓരോന്നിന്റെയും ആയിരത്തിൽ താഴെ സ്റ്റോക്ക് മാത്രമാണ് നിലവിലുള്ളത്. ആന്റിബയോട്ടിക്കുകളായ അമോക്സിലിൻ, സിപ്രോഫ്ലോക്സാസിൻ, സെഫ്ട്രിയാക്സോൺ, അസിത്രോമൈസിൻ, മെട്രോണിഡാസോൾ എന്നിവയുടെയും അടിയന്തര, ജീവൻ രക്ഷാ മരുന്നുകളായ അഡ്രിനാലിൻ, അട്രോപിൻ, ഓക്സിടോസിൻ, ഡയാസിപാം എന്നിവയുടെയും പനിക്കുള്ള പാരസെറ്റമോൾ വേദന സംഹാരികളായ ഐബുപ്രോഫെൻ, ഡൈക്ലോഫെനാക്, അലർജി, ശ്വാസകോശ രോഗങ്ങൾക്കുള്ള സെറ്റിറിസിൻ, സാൽബ്യൂട്ടാമോൾ, ബുഡെസോണൈഡ് ദഹന സംബന്ധമായ രോഗങ്ങൾക്കുള്ള പാന്റോപ്രസോൾ, ഒമിപ്രാസോൾ, ഒആർഎസ് പാക്കറ്റുകൾ, മാനസികാരോഗ്യം, അപസ്മാരം എന്നിവയ്‌ക്കുള്ള ഫെനിറ്റോയിൻ, സോഡിയം വാൽപ്രോയേറ്റ്, ഒലാൻസാപിൻ എന്നീ മരുന്നുകളുടെയും രണ്ടായിരത്തിൽ താഴെ സ്റ്റോക്ക് മാത്രമാണുള്ളത്. പേവിഷബാധയ്‌ക്കുള്ള ആന്റി റാബീസ്‌ സിറം, വാക്സിൻ ആൻഡ് സിറം, ആന്റി സ്-നേക്ക് വെനം എന്നിവയുടെയും സ്റ്റോക്ക് പരിമിതം.

ശസ്ത്രക്രിയ ഉപകരണങ്ങളുടെ വിതരണവും പ്രതിസന്ധിയിൽ

ആശുപത്രികളിൽനിന്ന് ശസ്ത്രക്രിയക്കും മാതൃ-ശിശു ആരോഗ്യ പരിചരണത്തിനും ആവശ്യമായ വസ്തുക്കൾ അടങ്ങിയ റിക്വയർമെന്റ ലിസ്റ്റ് പ്രൊപ്പോസലായി അതത്‌ ജില്ലാ ആശുപത്രികൾ സമർപ്പിച്ചവ സ്വീകരിക്കാൻ കെഎംഎസ്‌സിഎൽ തയ്യാറായിട്ടില്ല. ഗർഭിണികൾക്കും നവജാതശിശുക്കൾക്കുമുള്ള ചികിത്സയ്ക്കായി അൾട്രാസൗണ്ട് മെഷീനുകൾ, വോമറുകൾ, ഫോട്ടോതെറാപ്പി ഉപകരണങ്ങൾ എക്സ്-റേ മെഷീനുകൾ ഉൾപ്പെടെയുള്ള ഉപകരണങ്ങൾ നിലവിൽ സ്റ്റോക്ക് ഇല്ല. പുതിയത് വാങ്ങാനുള്ള ടെൻഡർ നടപടിയും ആയിട്ടില്ല. ജീവിതശൈലീരോഗ നിയന്ത്രണ പദ്ധതി, മാനസികാരോഗ്യ പദ്ധതി, എയ്ഡ്സ് കൺട്രോൾ സൊസൈറ്റി മരുന്നുകൾ, ശബരിമല സീസണിലേക്കുള്ള അടിയന്തര മരുന്നുകൾ, അർബൻ പ്രൈമറി ഹെൽത്ത് സെന്ററുകൾക്കുള്ള മരുന്ന് വിതരണം എന്നിവയും താറുമാറാണ്.