നെല്ലിനെ സ്‌മാർട്ടാക്കാൻ 
നിർമിതബുദ്ധി

ആലത്തൂർ

നൂതന സാങ്കേതികവിദ്യയിൽ നെൽകൃഷിയും സ്‌മാർട്ടാകും. ആലത്തൂർ വിത്തുൽപ്പാദന കേന്ദ്രത്തിലെ (സ്റ്റേറ്റ് സീഡ് ഫാം) 19 ഏക്കറിലെ നെൽകൃഷിയിൽ നിർമിതബുദ്ധി, റിമോട്ട് സെൻസിങ്‌ എന്നിവ പ്രയോഗത്തിലേക്ക്‌. പാലക്കാട് ഐഐടി (ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്‌നോളജി) വികസിപ്പിച്ച ഇന്റലിജന്റ് ഫാം മോണിറ്ററിങ്‌, ഇന്റലിജന്റ് ഇറിഗേഷൻ സിസ്റ്റം എന്നിവയാണ്‌ നടപ്പാക്കുക. കാലാവസ്ഥാ മാറ്റം ഉള്‍പ്പെടെയുള്ളവ നേരിടുക, വിഭവ വിനിയോഗം കാര്യക്ഷമമാക്കുക, ഉൽപ്പാദനക്ഷമത വർധിപ്പിക്കുക, സുസ്ഥിര കാർഷികരീതികൾ പ്രോത്സാഹിപ്പിക്കുക തുടങ്ങിയവയാണ്‌ ലക്ഷ്യം. നിർമിതബുദ്ധി, റിമോട്ട് സെൻസിങ്‌, സെൻസറുകൾ, ഡാറ്റാ അധിഷ്ഠിത സാങ്കേതിക ഉപകരണങ്ങൾ എന്നിവ ഉപയോഗിച്ചുള്ള നെൽകൃഷിയിലൂടെ വിത്തുൽപ്പാദനം കൂട്ടാനാകും. സീഡ് ഫാമിലെ ആധുനികവൽക്കരണം ലക്ഷ്യമിട്ട് 2024-–-25 സാമ്പത്തികവര്‍ഷത്തെ രാഷ്ട്രീയ കൃഷി വികാസ് യോജന പദ്ധതിയില്‍ ഉള്‍പ്പെടുത്തി അടുത്ത ഒന്നാംവിള മുതൽ ഇന്റലിജന്റ്‌ ഫാം മോണിറ്ററിങ്‌, ഇന്റലിജന്റ് ഇറിഗേഷൻ സിസ്റ്റം എന്നിവ ഫാമിൽ സ്ഥാപിക്കും. ഐഐടിയിലെ അഗ്രിടെക് സ്റ്റാർട്ടപ്പായ ‘റെവിൻ കൃഷി’ മുഖാന്തരമാകും പ്രവർത്തനം. ഇന്റലിജന്റ് ഫാം മോണിറ്ററിങ്‌ ഉപയോഗിച്ച് മണ്ണിന്റെയും സസ്യാരോഗ്യത്തിന്റെയും കാലാവസ്ഥ സാഹചര്യങ്ങളുടെയും സൂക്ഷ്മമായ മാറ്റങ്ങൾ മനസ്സിലാക്കാം. ‘റെവിൻ സ്കൈ പൾസ്‌’ എന്ന അത്യാധുനിക ഡ്രോൺ ഉപയോഗിച്ചുള്ള ചിത്രങ്ങളിലൂടെ ചെടിയുടെ ആരോഗ്യത്തെക്കുറിച്ച്‌ പൂർണ വിവരം യഥാസമയം ലഭ്യമാകും. വളപ്രയോഗം, രോഗകീടനിയന്ത്രണം എന്നിവ കാര്യക്ഷമമാക്കാനും കഴിയും. ഇന്റലിജന്റ് ഫാം മോണിറ്ററിങ്‌, ഇന്റലിജന്റ് ഇറിഗേഷൻ സിസ്റ്റം എന്നിവയുടെ പ്രദർശനവും സീഡ് ഫാമിൽ തയ്യാറാക്കിയ ഞാറ്റടി ഉപയോഗിച്ച് കൃഷിയിറക്കിയ പരിസ്ഥിതി സൗഹൃദ വിത്തുൽപ്പാദന നെൽകൃഷിയുടെ കൊയ്‌ത്തുത്സവവും വ്യാഴാഴ്ച നടക്കും. രാവിലെ 8.30ന് കെ ഡി പ്രസേനൻ എംഎൽഎ ഉദ്ഘാടനംചെയ്യും.