കൈകോർത്ത്‌ ജില്ലയും

പാലക്കാട്‌

കേന്ദ്ര സർക്കാരിന്റെ തൊഴിലാളിദ്രോഹ–കർഷകവിരുദ്ധ നയങ്ങൾക്കെതിരെ സംയുക്ത ട്രേഡ് യൂണിയൻ നേതൃത്വത്തിലുള്ള അഖിലേന്ത്യാ പണിമുടക്കിൽ ജില്ല സ്‌തംഭിക്കും. ബുധനാഴ്‌ച സർക്കാർ ഓഫീസുകൾ, സ്‌കൂളുകൾ, വ്യവസായ സ്ഥാപനങ്ങൾ, കടകമ്പോളങ്ങൾ തുടങ്ങിയവ തുറക്കില്ല. കെഎസ്‌ആർടിസിയും സ്വകാര്യ ബസും നിരത്തിലിറങ്ങില്ല. കഞ്ചിക്കോട്‌ വ്യവസായ മേഖലയിലെ മുഴുവൻ തൊഴിലാളികളും പണിമുടക്കും. പണിമുടക്കിയ ജീവനക്കാരും തൊഴിലാളികളും പഞ്ചായത്ത്‌ അടിസ്ഥാനത്തിൽ 96 സമരകേന്ദ്രങ്ങളിൽ അണിനിരക്കും. 15 ഡിവിഷൻ അടിസ്ഥാനത്തിൽ പ്രത്യേക സമരകേന്ദ്രങ്ങളുമുണ്ടാകും. പാലക്കാട്‌ സ്‌റ്റേഡിയം ബസ്‌ സ്‌റ്റാൻഡിലെ ജില്ലാ സമരകേന്ദ്രത്തിൽ സിഐടിയു സംസ്ഥാന വൈസ്‌ പ്രസിഡന്റ്‌ എ കെ ബാലൻ ഉദ്‌ഘാടനം ചെയ്യും. തൊഴിലാളികൾ വ്യവസായ സ്ഥാപനങ്ങൾക്കുമുന്നിൽ പ്രകടനം നടത്തിയശേഷം പഞ്ചായത്തുകളിലെ സമരകേന്ദ്രങ്ങളിൽ എത്തും. സിഐടിയു, ഐഎൻടിയുസി, എഐടിയുസി, എൽപിഎഫ്‌, യുടിയുസി, എച്ച്‌എംഎസ്‌, സേവ, ടിയുസിഐ, എൻഎൽസി, ടിയുസിസി, ജെഎൽയു, എൻഎൽയു, കെടിയുസി എസ്‌, കെടിയുസി എം, ഐഎൻഎൽസി, എൻടിയുഐ, എച്ച്‌എംകെപി എന്നീ സംഘടനകളുടെ നേതൃത്വത്തിലാണ്‌ പണിമുടക്ക്‌. വിപുലമായ പ്രവർത്തനങ്ങളാണ്‌ സംയുക്ത സമരസമിതി ജില്ലയിൽ നടത്തിയത്‌. ജില്ലാ, ഡിവിഷൻ, പഞ്ചായത്ത്‌ കോ–-ഓർഡിനേഷൻ കൺവൻഷനുകൾ, 164 സംസ്ഥാന–-ജില്ലാ യൂണിയനുകളുടെ ജനറൽ ബോഡികൾ, കമ്മിറ്റികൾ എന്നിവ വിളിച്ചുചേർത്തു. കാൽനട പ്രചാരണ ജാഥയും സംസ്ഥാന മേഖലാ വാഹന ജാഥയും നടത്തി.105 വിളംബര ജാഥകൾ നടത്തി. തിങ്കൾ, ചൊവ്വ ദിവസങ്ങളിൽ പഞ്ചായത്ത്‌ അടിസ്ഥാനത്തിൽ പന്തംകൊളുത്തി പ്രകടനവും നടന്നു. ലേബർ കോഡുകൾ പിൻവലിക്കുക, പൊതുമേഖലാ സ്ഥാപനങ്ങളുടെ സ്വകാര്യവൽക്കരണം അവസാനിപ്പിക്കുക, വിലക്കയറ്റം നിയന്ത്രിക്കുക, സ്‌കീം വർക്കേഴ്‌സിനെ തൊഴിലാളികളായി അംഗീകരിക്കുക, അവർക്ക്‌ 26,000 രൂപ ശമ്പളം നൽകുക, സ്‌കീം വർക്കേഴ്‌സിന്‌ ഗ്രാറ്റിവിറ്റി അഞ്ചുലക്ഷമാക്കുക, ഇഎസ്‌ഐ, ഇപിഎഫ്‌ സംവിധാനം ഏർപ്പെടുത്തുക, മിനിമം പെൻഷൻ 9.000 രൂപയാക്കുക, കരാർവൽക്കരണം അവസാനിപ്പിക്കുക തുടങ്ങിയ 17 മുദ്രാവാക്യങ്ങൾ ഉന്നയിച്ചാണ്‌ ദേശവ്യാപകമായ പണിമുടക്ക്‌.

മാധ്യമപ്രവർത്തകരും അണിചേരും

പാലക്കാട്‌

പൊതുപണിമുടക്കിന്‌ ഐക്യദാർഢ്യവുമായി ജില്ലയിലെ മാധ്യമപ്രവർത്തകരും. കേരള പത്രപ്രവർത്തക യൂണിയൻ ജില്ലാ കമ്മിറ്റി, കേരള ന്യൂസ്‌ എംപ്ലോയീസ്‌ ഫെഡറേഷൻ ജില്ലാ കമ്മിറ്റി എന്നിവ സംയുക്തമായി ബുധനാഴ്ച ഐക്യദാർഢ്യ സദസ്സ്‌ നടത്തും. പകൽ 11.30ന്‌ പാലക്കാട്‌ പ്രസ്‌ക്ലബ്ബിനുമുന്നിൽ സിഐടിയു സംസ്ഥാന കമ്മിറ്റിയംഗം എസ്‌ ബി രാജു ഉദ്ഘാടനം ചെയ്യും. ഐഎൻടിയുസി ജില്ലാ പ്രസിഡന്റ്‌ എസ്‌ കെ അനന്തകൃഷ്ണൻ മുഖ്യാതിഥിയാകും.

വിളംബരജാഥയുമായി കെഎസ്എഫ്ഇ ജീവനക്കാർ

പാലക്കാട്‌

അഖിലേന്ത്യാ പണിമുടക്കിന്‌ ഐക്യദാർഢ്യവുമായി കെഎസ്എഫ്ഇ ജീവനക്കാരുടെ സംഘടനകൾ പാലക്കാട്‌ റീജണൽ ഓഫീസിനുമുന്നിൽ വിളംബര ജാഥ നടത്തി. കെഎസ്എഫ്ഇ സ്റ്റാഫ് അസോസിയേഷൻ ജില്ലാ സെക്രട്ടറി കെ വി സജിത്ത് ഉദ്‌ഘാടനം ചെയ്തു. സ്റ്റാഫ്‌ അസോസിയേഷൻ സംസ്ഥാന വൈസ് പ്രസിഡന്റ്‌ സുരേഷ്‌കുമാർ, ഓഫീസേഴ്സ് യൂണിയൻ സംസ്ഥാന കമ്മിറ്റി അംഗം മുഹമ്മദാലി, ഏജന്റ്സ് അസോസിയേഷൻ ജില്ലാ പ്രസിഡന്റ്‌ ജനാർദനൻ എന്നിവർ സംസാരിച്ചു.