ജനമനസ്സുകളിൽ ജൈത്രയാത്ര

ആലത്തൂർ

സംസ്ഥാനത്തെ മികച്ച പ്രാഥമിക സഹകരണ കാർഷിക ഗ്രാമവികസന ബാങ്ക്‌–-ഈ വിലാസം മതി ആലത്തൂരിന്റെ കാർഷിക ഭൂമികയുടെ സാമ്പത്തിക ശക്തിയായ ആലത്തൂർ പ്രാഥമിക സഹകരണ കാർഷിക ഗ്രാമവികസന ബാങ്കിന്‌. തുടർച്ചയായ ആറാംതവണയാണ്‌ സംസ്ഥാന സർക്കാരിന്റെ പുരസ്‌കാരം നേടുന്നത്‌. ആലത്തൂർ താലൂക്കിലെ കർഷകരുടെയും സാധാരണക്കാരുടെയും ഉറ്റമിത്രമായി ബാങ്ക് മാറിയിട്ട്‌ 36 വർഷമായി. കുറഞ്ഞ പലിശയ്‌ക്ക്‌ കാർഷിക വായ്പകളും ഭവന, വാഹന, വിദ്യാഭ്യാസ വായ്പകളും സ്വർണപ്പണയവും നൽകിവരുന്നു. 245.21 കോടി രൂപയുടെ വായ്പ ബാക്കിനിൽപ്പും 1287.47 ലക്ഷം ഓഹരി ബാക്കിനിൽപ്പുമുള്ള സ്ഥാപനത്തിൽ 36,986 എ ക്ലാസ് അംഗങ്ങളുണ്ട്‌. 11 വർഷമായി ഡിവിഡന്റ്‌ നൽകുന്നു. പ്രതിസന്ധി ഘട്ടങ്ങളിലും ഇതിന്‌ മുടക്കമുണ്ടായില്ല. 96 വാർഡിലായി 20,000 പേർക്ക് പെൻഷൻ വിതരണം ചെയ്യുന്നുണ്ട്‌. വായ്പവിതരണം, തിരിച്ചടവ്, സാമൂഹ്യ–-സേവന പ്രവർത്തനങ്ങൾ, പലിശരഹിത കോവിഡ് വായ്പ, നീതി മെഡിക്കൽ സ്‌റ്റോർ, സഹകരണ കൺസ്യൂമർ സ്‌റ്റോർ, അരിക്കട, ഫാർമേഴ്സ് ക്ലബ്, സോളാർ വൈദ്യുതി ഉൽപ്പാദനം, അടിസ്ഥാന സൗകര്യ വികസനം തുടങ്ങിയ മേഖലകളിൽ ബാങ്ക് മികച്ച പ്രവർത്തനമാണ്‌ നടത്തുന്നത്‌. പ്രയാസങ്ങൾക്കിടയിലും ബാങ്കിന്റെ പ്രവർത്തനങ്ങളോട് സഹകരിച്ച് അംഗങ്ങൾക്കും സഹകാരികൾക്കും ജീവനക്കാർക്കും അവകാശപ്പെട്ടതാണ് പുരസ്‌കാരമെന്ന് സെക്രട്ടറി എൻ ജ്യോതി പറഞ്ഞു.