നെല്ല്‌ സംഭരണത്തിനൊരുങ്ങി ആലത്തൂർ സഹകരണ ബാങ്ക്‌

ആലത്തൂർ

കർഷകരെ സഹായിക്കാൻ ആലത്തൂർ സർവീസ്‌ സഹകരണ ബാങ്ക്‌ തിങ്കളാഴ്‌ച മുതൽ നെല്ല്‌ സംഭരിക്കും. സംഭരിച്ച ഉടൻ നൽകുന്ന രശീതി ബാങ്കിൽ നൽകിയാൽ അപ്പോൾതന്നെ പണം നൽകും. കേന്ദ്ര സർക്കാരിന്റെ താങ്ങുവിലയായ 23.69 രൂപ വർധിപ്പിച്ച് 24.50 രൂപയ്ക്കാണ് ബാങ്ക് നെല്ല് എടുക്കുക. വാഹനങ്ങൾ കടന്നുചെല്ലുന്ന കർഷകരുടെ വീടുകളിൽ നിന്നും സംഭരണകേന്ദ്രങ്ങളിൽ നിന്നും കർഷകരുടെ ഉത്തരവാദിത്തത്തിൽ നേരിട്ടെത്തി സംഭരിക്കും. സപ്ലൈകോ നിഷ്കർഷിക്കുന്ന തരം നെല്ല് മാത്രമായിരിക്കും സംഭരിക്കുക. മഴയെത്തിയതോടെ കൊയ്തെടുത്ത നെല്ല് സൂക്ഷിക്കാൻ ഇടമില്ലാത്ത ചെറുകിട കർഷകർ പ്രതിസന്ധിയിലായിരുന്നു. ഇതിന്‌ പരിഹാരമായാണ്‌ കർഷകസംഘം ജില്ലാ പ്രസിഡന്റുകൂടിയായ കെ ഡി പ്രസേനൻ എംഎൽഎ ഇടപെട്ട്‌ പദ്ധതി തയ്യാറാക്കിയത്‌. സപ്ലൈകോ വഴിയുള്ള സംഭരണം നീട്ടികൊണ്ടുപോകാൻ പലവിധ കാരണങ്ങൾ പറഞ്ഞ്‌ കേന്ദ്രം തടസം സൃഷ്ടിക്കുകയാണ്‌. നൂറ്‌ കിലോ നെല്ല്‌ സംഭരിച്ചാൽ 68 കിലോ അനുപാതത്തിൽ അരി നൽകണമെന്നാണ്‌ കേന്ദ്ര നിബന്ധന. എന്നാൽ, ഇതിന്‌ മില്ലുടമകൾ തയ്യാറായില്ല. ഇ‍ൗ സാഹചര്യത്തിൽ മില്ലുകാരുമായി കരാർ ഒപ്പിടാൻ വൈകിയതോടെ സംഭരണവും നീണ്ടു. ഇതോടെ കർഷകർ ചുരുങ്ങിയ വിലയ്‌ക്ക്‌ നെല്ല്‌ നൽകാൻ നിർബന്ധിതരായി. കർഷകരുടെ ഇ‍ൗ അവസ്ഥ മനസിലാക്കിയാണ്‌ ബാങ്ക്‌ നെല്ല്‌ സംഭരണത്തിലേക്കിറങ്ങിയത്‌. കേരളത്തിൽ ആദ്യമായണ്‌ ഒരു സഹകരണസംഘം നെല്ല്‌ സംഭരണത്തിന്‌ സന്നദ്ധമായത്‌. നെല്ല്‌ നൽകുന്ന കർഷകർക്ക്‌ 9447325878 നമ്പറിൽ ബന്ധപ്പെടാം.