അടുപ്പിൽ ഉന്നതി: ബിജെപിക്കെതിരെ പ്രതിഷേധം

സ്വന്തം ലേഖകൻ നാദാപുരം ​ വിലങ്ങാട് അടുപ്പിൽ ഉന്നതിയിലെ 27 കുടുംബങ്ങൾക്ക്‌ വീട്‌ നിർമിച്ചുനൽകാമെന്ന്‌ പറഞ്ഞ്‌ ദുരിതത്തിലേക്ക് തള്ളിവിട്ട ബിജെപിക്കെതിരെ പ്രതിഷേധം ശക്തമാകുന്നു. ആദിവാസി ക്ഷേമ സമിതിയും ഡിവൈഎഫ്ഐയും പ്രതിഷേധവുമായി രംഗത്തെത്തി. ഉന്നതി നിവാസികൾക്കിടയിലും പ്രതിഷേധം കടുക്കുകയാണ്. അടിയന്തരമായി വീട് നിർമാണം പൂർത്തീകരിക്കണമെന്ന ആവശ്യം വിവിധ വിഭാഗങ്ങളിൽനിന്ന്‌ ഉയർന്നിട്ടുണ്ട്‌.​ അടുപ്പിൽ ഉന്നതി സ്ഥിതി ചെയ്യുന്ന പ്രദേശം ഉരുൾപൊട്ടൽ ഭീഷണി നേരിടുന്ന മേഖലയാണെന്ന്‌ ജിയോളജി വകുപ്പ് നടത്തിയ പഠനത്തിൽ കണ്ടെത്തിയിരുന്നു. ഇതിനെ തുടർന്നാണ്‌ ഇവിടുത്തെ 65 കുടുംബങ്ങളെ അടിയന്തരമായി മാറ്റി പാർപ്പിക്കണമെന്ന് സർക്കാർ തീരുമാനമെടുത്തത്. ഊരാളുങ്കൽ ലേബർ സൊസൈറ്റി വീട് നിർമാണ പ്രവർത്തനം ഏറ്റെടുത്ത് നടത്തുന്നതിനിടെയാണ്‌ ഉന്നതിയിലെ ഗുണഭോക്താക്കളെ ബിജെപിയുടെ പ്രാദേശിക നേതൃത്വം തെറ്റിദ്ധരിപ്പിച്ചത്. തുടർന്ന്‌ 27 കുടുംബങ്ങളുടെ വീടിന്റെ നിർമാണ ചുമതല ബിജെപി നിയന്ത്രണത്തിലുള്ള സൊസൈറ്റി ഏറ്റെടുക്കുകയും നിർമാണത്തിന്റെ തുക വാങ്ങുകയും ചെയ്തു. എന്നാൽ നിർമാണം പൂർത്തീകരിക്കാതെ ഉന്നതിയിലുള്ളവരെ വഞ്ചിക്കുകയായിരുന്നു. ഊരാളുങ്കൽ സൊസൈറ്റി നിർമിക്കുന്ന വീടിനേക്കാൾ മികച്ച സൗകര്യമൊരുക്കും എന്നായിരുന്നു ബിജെപിക്കാർ നൽകിയ വാഗ്ദാനം. എന്നാൽ ഊരാളുങ്കൽ ലേബർ കോൺട്രാക്ട് സൊസൈറ്റി വീടുകളുടെ നിർമാണം പൂർത്തീകരിച്ച് കൈമാറിയിട്ടും ബിജെപി സൊസൈറ്റിയുടെ വീടുകൾ എവിടേയും എത്തിയിട്ടില്ല.