നാട്ടുകാരെല്ലാം ഈ തോട്ടത്തിന്റെ ഉടമസ്ഥരാണ്‌

പുതിയങ്ങാടി ഈ തോട്ടത്തിന്‌ ഉടമസ്ഥരില്ല കുട്ടികൾക്കും നാട്ടുകാർക്കും ഇനി സ്വതന്ത്രമായി മാവിനെറിയാം ചാമ്പക്ക പറിക്കാം, പേരക്ക തിന്നാം... ആരും ചോദിച്ചുവരില്ല... എടക്കാട് വാർഡിലെ തെരഞ്ഞെടുത്ത രണ്ട് കിലോമീറ്റർ ചുറ്റളവിലാണ് കോർപറേഷന്റെ അമൃത് മിത്ര പദ്ധതിയിൽ ഉൾപ്പെടുത്തി ആരംഭിക്കുന്ന വുമൺസ് ഫോർ ലീഡ് പദ്ധതി പ്രകാരം ഫലവൃക്ഷത്തെകൾ വച്ചുപിടിപ്പിച്ചിരിക്കുന്നത്‌. ഒരുവർഷത്തിനകം ഇവ കായ്ച്ച് തുടങ്ങും കുടുംബശ്രീ പ്രവർത്തകർ നടലും പരിപാലനവും നിർവഹിക്കുന്ന പദ്ധതി യാഥാർഥ്യമാവുന്നതോടെ തെരഞ്ഞെടുത്ത എടക്കാട് സർക്കിൾ ഹരിതാഭമാവും. നാലുകിലോമീറ്റർ ദൂരത്താണ് വിവിധതരം ഫലവൃക്ഷങ്ങൾ വച്ചുപിടിപ്പിക്കുക. അമൃത് പദ്ധതിയിൽ ഉൾപ്പെടുത്തി പൈലറ്റ് പദ്ധതിയായാണ് എടക്കാട് വാർഡിൽ ആരംഭിച്ചിരിക്കുന്നത്. ഏതൊരാൾക്കും ആരോടും ചോദിക്കാതെ ഫലങ്ങൾ പറിച്ചുകഴിക്കാൻ പാകത്തിൽ ഒരുവർഷംകൊണ്ട് കായ്ക്കുന്ന പത്ത്‌ ഇനത്തിൽപ്പെട്ട അഞ്ഞൂറോളം ഫലവൃക്ഷത്തൈകളാണ് നട്ടുപിടിപ്പിക്കുക. നാല് അടിയോളം വളർച്ചയെത്തിയ ചെടികളാണ് ഈസ്റ്റ്ഹിൽ നിന്നാരംഭിച്ച് ഗണപതികാവ്, നെല്ലിക്കാപുളി പാലം വഴി കാരപ്പറമ്പ് ജങ്‌ഷൻ വരെയുള്ള സർക്കിളിൽ നട്ടുപിടിപ്പിക്കുന്നത്. കുടുംബശ്രീ എൻയുഎംഎൽ പദ്ധതിയിൽ ഉൾപ്പെടുത്തി പ്രത്യേകം തെരഞ്ഞെടുത്ത വളന്റിയർമാർക്ക് പരിപാലന ചുമതല നൽകിയാണ് പദ്ധതി ആവിഷ്‌കരിച്ചിട്ടുള്ളത്. ഇതിന്‌ കൂലി ലഭിക്കും. 73ാം വാർഡിലെ വിവിധ പ്രദേശങ്ങളിലെ പരിസ്ഥിതി പ്രവർത്തകർ, റസിഡന്റ്‌സ് അസോസിയേഷനുകൾ, കുടുംബശ്രീ യൂണിറ്റുകൾ, യുവജന സംഘടനകൾ, ക്ലബ്ബുകൾ തുടങ്ങിയവരും പങ്കാളികളാകും. മേയർ ബീന ഫിലിപ്പ് ഉദ്ഘാടനംചെയ്തു. 
കൗൺസിലർ ടി മുരളീധരൻ അധ്യക്ഷനായി. മുൻ കൗൺസിലർ കെ വി ബാബുരാജ്, കെ സി ശങ്കരനാരായണൻ, സിഡിഎസ് ചെയർപേഴ്‌സൺ അംബിക, എടക്കാട് യൂണിയൻ എഎൽപി സ്‌കൂൾ പ്രധാന അധ്യാപിക എ ജി ദീപ, അമൃത് വിഭാഗം ചുമതലക്കാരൻ മുഹമദ് റാഫി, എൻയുഎംഎൽ പ്രതിനിധി മുനീർ, എഡിഎസ് ചെയർപേഴ്‌സൺ യമുന എന്നിവർ സംസാരിച്ചു.