സിപിഐ എം പ്രതിഷേധിച്ചു

കോട്ടയം ദേശീയ മെഡിക്കൽ പ്രവേശന പരീക്ഷ (നീറ്റ് യുജി)യുടെ ചോദ്യപ്പേപ്പർ ചോർന്നതിനെതിരെ മാർച്ച്‌ നടത്തിയ എസ്‌എഫ്‌ഐ പ്രവർത്തകരെ അറസ്‌റ്റ്‌ ചെയ്‌ത്‌ ജയിലിലടച്ചതിൽ പ്രതിഷേധിച്ച്‌ സിപിഐ എം പ്രകടനം നടത്തി. തിരുനക്കര മോട്ടോർ തൊഴിലാളി യൂണിയൻ ഓഫീസ്‌ പരിസരത്തുനിന്നാരംഭിച്ച പ്രകടനം നഗരം ചുറ്റി തിരുനക്കര ബസ്‌ സ്‌റ്റാൻഡ്‌ പരിസരത്ത്‌ സമാപിച്ചു. സിപിഐ എം കോട്ടയം ഏരിയ കമ്മിറ്റി സംഘടിപ്പിച്ച പ്രതിഷേധപ്രകടനവും പൊതുയോഗവും ജില്ലാ സെക്രട്ടറിയറ്റംഗം കെ എം രാധാകൃഷ്‌ണൻ ഉദ്‌ഘാടനം ചെയ്‌തു. ജില്ലാ കമ്മിറ്റി അംഗം എം കെ പ്രഭാകരൻ അധ്യക്ഷനായി. ജില്ലാ സെക്രട്ടറിയറ്റംഗം റെജി സഖറിയ, ഏരിയ സെക്രട്ടറി ബി ശശികുമാർ, ജില്ലാ കമ്മിറ്റി അംഗങ്ങളായ സി എൻ സത്യനേശൻ, കെ ആർ അജയ്‌ എന്നിവർ സംസാരിച്ചു. ദേശീയ മെഡിക്കൽ പ്രവേശന പരീക്ഷയുടെ ചോദ്യ പേപ്പർ ചോർച്ചയിൽ പ്രതിഷേധിച്ച്‌ എസ്‌എഫ്‌ഐ കഴിഞ്ഞ ദിവസം ഹെഡ്‌പോസ്‌റ്റ്‌ ഓഫീസിലേക്ക്‌ മാർച്ച്‌ നടത്തിയിരുന്നു. എസ്എഫ്ഐ കേന്ദ്ര കമ്മിറ്റി അംഗം ടോണി കുര്യാക്കോസ്, സംസ്ഥാന സെക്രട്ടറിയറ്റംഗം വൈഷ്ണവി ഷാജി ഉൾപ്പെടെ 16 പേരെ റിമാൻഡിലാണ്‌.