ജില്ലാ സ്കൂൾ കലോത്സവം 
25ന്‌ തുടക്കമാകും

കോട്ടയം

റവന്യൂ ജില്ലാ 36–-ാ മത് സ്കൂൾ കലോത്സവം 25, 26, 27, 28 തീയതികളിൽ കോട്ടയം എംഡി സെമിനാരി ഹയർ സെക്കൻഡറി സ്കൂളിൽ സംഘടിപ്പിക്കും. 13 ഉപജില്ലകളിൽനിന്ന്‌ ഹൈസ്‌കൂൾ, ഹയർസെക്കൻഡറി, വെക്കേഷണൽ ഹയർ സെക്കൻഡറി വിഭാഗങ്ങളിലെ 8,000 കുട്ടികൾ കലാമേളയിൽ മാറ്റുരയ്ക്കും. 305 നൃത്തനൃത്യേതര ഇനങ്ങളിലാണ് മത്സരങ്ങൾ നടക്കുന്നത്. എംഡി സെമിനാരി എച്ച്എസ്, എംടി സെമിനാരി എച്ച്എസ്എസ്, മൗണ്ട് കാർമ്മൽ എച്ച്എസ്എസ്, സെന്റ്‌ ആൻസ് എച്ച്എസ്എസ്, ബേക്കർ എൽപിഎസ്, വിദ്യാധിരാജാ എച്ച്എസ്, ഹോളിഫാമിലി എച്ച്എസ്എസ്, സെന്റ് ജോസഫ്സ് സിജിഎച്ച്എസ്, എംടി എൽപിഎസ്, എംഡി എൽപിഎസ് എന്ന‍ീ സ്കൂളുകളിലെ 13 വേദികളിലായാണ് കലാമത്സരങ്ങൾ നടക്കുന്നത്. ചൊവ്വാ വൈകിട്ട് കോട്ടയം മാമ്മൻ മാപ്പിള ഹാൾ പരിസരത്ത്നിന്ന്‌ എംഡി സെമിനാരി സ്കൂളിലേക്ക്‌ ആയിരത്തിലധികം കുട്ടികൾ പങ്കെടുക്കുന്ന ഘോഷയാത്രയും തുടർന്ന്‌ നാലിന്‌ ഉദ്‌ഘാടനവും നടക്കുമെന്ന്‌ ജില്ലാ വിദ്യാഭ്യാസ ഉപഡയറക്ടർ ഹണി ജി അലക്സാണ്ടർ, പബ്ലിസിറ്റി കൺവീനർ ആർ ജിഗി എന്നിവർ അറിയിച്ചു.